04 декабря 2010 г.
Депутатсен районти Пухăвĕн черетлĕ виççĕмĕш ларăвĕ район администрацийĕн ларусен залĕнче декабрĕн 2-мĕшĕнче ĕçлерĕ. Кун йĕркине кĕртнĕ ыйтусенчен: районăн 2011 çулхи экономикăпа социаллă аталанăвĕн прогнозне палăртассине тата çитес çулхи бюджета йышăнассине чи пĕлтерĕшлĕ ыйтусем тесе палăртмалла. Çавна май ку ыйтусемпе район администрацийĕн экономика пайĕн пуçлăхĕ Э.И. Симакова тата финанс пайĕн пуçлăхĕ Р.И. Ананьева туса панă докладсене депутатсем хĕрÿ сÿтсе яврĕç. Çакна ăнланмалла та. Укçа-тенкĕ ыйтăвĕ яланах чи çивĕччисенчен пĕри пулнă, бюджетра вара вăл нихăçан та ытлă-çитлĕ пулман.
Конкретлă цифрăсем пирки вара çавна каламалла. Районăн çитес çулхи бюджетне тупăшсем енĕпе 345619 пин тенкĕ пăхса хăварнă. Ку вăл кăçалхин 89,9 проценчĕ чухлĕ пулать. Тăкаксем вара 352919 пин тенкĕпе (88,4 процент) танлашмалла. Бюджет дефицичĕ – 7300 пин тенкĕ. Апла пулсан, тухса калаçакансем тĕрĕсех палăртрĕç, перекетлĕх, тирпейлĕх, налуксем пухассине лайăхрах йĕркелесси, хыснана укçа пухмалли ытти мелсемпе усă курасси пирки ытларах тимлеме тивет.
ЧР Патшалăх Канашĕн депутачĕ, районти тĕп больницăн тĕп врачĕ В.Г. Данилов та çавăн пиркиех чарăнса тăчĕ. Укçа-тенкĕ енĕпе хальхи вăхăтра никама та çăмăлах мар. Сывлăха сыхлас ĕç валли те çитес çул валли кăçалхинчен 5 миллион тенкĕ сахалрах пăхса хăварнă. Апла пулин те çакă çынсен сывлăхне сыхлас ĕç пахалăхĕ çинче палăрмалла мар. Тăкаксене чакарасси пирки ытларах шутлас пулать. Вĕсем вара паянхи кун çук мар.
Депутатсем Пуху ларăвĕнче йышăннă тепĕр пĕлтерĕшлĕ документ вăл – «Муркаш районĕн культури: 2011 – 2020 çулсем» тĕллевлĕ программа. Çавна асăнмалла. Ку вăл пĕр çуллăх йышăннă программа мар. Малашлăх валли унта питех те пысăк пĕлтерĕшлĕ анлă задачăсем палăртнă. Вĕсемпе район администрацийĕн культура тата архив ĕçĕсен пайĕн пуçлăхĕ А.Е. Андреева паллаштарчĕ. Программăна йышăнчĕç. Мĕнех, халĕ вара мĕн палăртнине пурнăçа кĕртессишĕн ответлисен çанă тавăрса ĕçлесси кăна юлать.
Депутатсем ларура пĕлтерĕшлĕ ытти ыйтусене те сÿтсе яврĕç, тивĕçлĕ йышăнусем турĕç. Анчах та йышăнусем йышăнусемпе кăна ан юлччăрччĕ. Вĕсене пурнăçа кĕртсе пырасси вара пуринчен тата кашнинчен килет темелле. Вăл шутра депутсем халăхпа тачă çыхăнса ĕçлеме пултарни те пысăк пĕлтерĕшлĕ. Çак шухăша юлашкинчен хăйĕн сăмахĕнче район администрацийĕн пуçлăхĕ Ю.А. Иванов та палăртрĕ.
В. ШАПОШНИКОВ.