23 октября 2010 г.
Октябрĕн 20-мĕшĕнче пилĕкмĕш суйлаври депутатсен районти Пухăвĕн пĕрремĕш ларăвĕ ĕçлерĕ. Ăна çулĕсемпе чи аслă депутат П.В. Воробьев уçрĕ.
Малтан районти территори суйлав комиссийĕн ертÿçи А.В. Андреев çĕнĕрен суйланă депутатсене халăх шанăçне тивĕçнĕ ятпа саламларĕ, кашнинех депутат удостоверенине пачĕ. Çак чыса çĕнĕрен суйланă ял тăрăхĕсен пуçлăхĕсем те тивĕçрĕç.
Унтан район пуçлăхĕ Ю.А. Иванов хăйĕн тивĕçĕсене хурасси çинчен пĕлтерчĕ, ятарлă йышăнăва алă пусрĕ. Вăл хăйĕн сăмахĕнче иртнĕ тапхăрта пĕр-пĕринпе çыхăнса ĕçлесе нумай ĕç тунине палăртрĕ. Пурне те тав сăмахĕ каларĕ.
Пĕрремĕш ларăва официаллă уçнă хыççăн депутатсем кун йĕркине çирĕплетрĕç.
Кун йĕркинчи пĕрремĕш ыйту: Муркаш район пуçлăхне – депутатсен Муркаш район Пухăвĕн ертÿçине суйласси.
Ку ыйтупа П.В. Воробьев (6 " Мăн Сĕнтĕр округĕ), В.И. Вязов (14 " Атапай округĕ), Ю.А. Иванов (1 " Октябрь округĕ), А.Н. Иванов (16 " Очăкасси округĕ), Н.А. Кожевников (15 " Çатракасси округĕ) депутатсем тухса каларĕç. П.В. Воробьев депутат хăйĕн сăмахĕнче ĕç тăвакан влаç депутатсем çине витĕм кÿме тăрăшнине палăртрĕ, район пуçлăхне вăрттăн сасăласа суйлама сĕнчĕ. В.И. Вязов депутат вара ĕç тăвакан влаç депутатсене ирĕксĕрленине йышăнмарĕ, вăл хăй кирек епле ыйтупа та мĕн калас тенине ялан калама пултарнине палăртрĕ. Ю.А. Иванов депутат депутатсене халăх шанса суйланине палăртса уççăн сасăлама чĕнсе каларĕ. А.Н. Иванов депутат шухăшĕпе вара депутатсем хăйсене ирĕклĕ туйччăр тесен вĕсен вăрттăн сасăламалла. Н.А. Кожевников депутат уççăн сасăлама кирлине асăнчĕ.
Дискусси хыççăн депутатсем район пуçлăхне уççăн сасăласа суйлама йышăнчĕç.
«Единая Россия» партин районти парламентри фракцийĕн ертÿçи Н.Г. Ванеркин депутат (9 " Катькас округĕ) район пуçлăхне – депутатсен районти Пухăвĕн ертÿçине суйлама И.В. Николаев депутата ( 4 " Ваçкасси округĕ) сĕнчĕ.
И.В. Николаев унччен те депутатсен районти Пухăвне ертсе пынă. Сĕнекен вăл çак ĕçе пĕлнине палăртрĕ. И.В. Николаев Ильич ячĕпе хисепленекен хуçалăх председателĕнче вăй хурать.
Депутатсем пĕр шухăшлăн сасăласа И.В. Николаева Муркаш район пуçлăхне – депутатсен Муркаш район Пухăвĕн ертÿçине суйларĕç.
И.В. Николаев пысăк ĕç шаннăшăн тав турĕ. Иртнĕ тапхăрта тунă ĕçсене хак пачĕ, умра пысăк ĕçсем кĕтнине палăртрĕ.
Унтан лару депутатсен районти Пухăвĕн ертÿçин çумне суйларĕ. Ку ыйту пысăк калаçу çуратмарĕ. Депутатсен районти Пухăвĕн ертÿçин çумĕ пулма В.И. Вязов депутата суйларĕç.
Кун йĕркинчи виççĕмĕш ыйтăва пăхса тухса лару яланхи комиссисен председателĕсене суйларĕ тата вĕсен йышне çирĕплетрĕ. Яланхи комиссисене Б.В. Андреев (18 " Анаткасси округĕ), А.А. Сидюшкин (19 " Хорнуй округĕ), В.И. Кожанов (8 " Тренккă округĕ) депутатсем ертсе пырĕç.
Кун йĕркинчи тăваттăмĕш ыйту – депутатсен районти Пухăвĕн ревизи комиссийĕн йышне çирĕплетесси. Лару комисси йышне П.А. Бирюков (12 " Рыккакасси округĕ), П.В. Воробьев, Ф.Ф. Григорьева (3 " Шаптак округĕ) депутатсене кĕртрĕ. Ревизи комиссийĕн ертÿçине çак комисси хăйĕн ларăвĕнче суйлать.
Район администрацийĕн пуçлăхĕ малашне контракт йĕркипе ĕçлекен çын пулать. Ăна палăртма конкурс ирттереççĕ. Çак конкурса ирттерме ятарлă комисси йĕркелемелле. Вăл комисси йышăнче 9 çын пулмалла. 6-не депутатсен районти Пухăвĕ сĕнет, 3-не ЧР Президенчĕ тăратать.
Лару комисси йышне районтан çак 6 çынна сĕнчĕ: «Росгосстрахăн» районти пайĕн ертÿçи В.И. Вязов, «Ударник» хуçалăх ертÿçи П.П. Давыдов, районти тĕп больницăн тĕп врачĕ, ЧР Патшалăх Канашĕн депутачĕ В.Г. Данилов, района нумай çул ăнăçлă ертсе пынă В.С. Краснов пенсионер, райадминистрацин йĕркелÿ пайĕн ертÿçи Л.Ю. Тарасова, район пуçлăхĕ – депутатсен районти Пухăвĕн ертÿçи, Ильич ячĕпе хисепленекен хуçалăх председателĕ И.В. Николаев.
Конкурс комиссийĕн йышне тепĕр 3 çынна республикăри влаç органĕсенчен тăратма лару ЧР Президенчĕ ячĕпе чĕнсе каларĕ.
Пĕрремĕш лару çакăнпа хăйĕн ĕçне вĕçлерĕ. Районти парламент ĕçлеме юрăхлине пĕрремĕш ларурах кăтартса пачĕ. Депутатсем хăйсен шухăшне те калама пултарчĕç, тивĕçлĕ решенисем те йышăнчĕç.
Районти парламентри депутатсен вăтам ÿсĕмĕ 50 çул. 22 депутат «Единая Россия» партин фракцине йĕркеленĕ. Коммунистсенчен парламента 1 депутат суйланнă.
А. ИВАНОВ.