20 октября 2010 г.
ЧР Ял хуçалăх министерствипе çĕр ĕçĕнче ĕçлекен техникăна пăхса тăракан патшалăх инспекцийĕ юпа уйăхĕн 5-25-мĕшĕсенче «Чăваш Республикинчи ял хуçалăх предприятийĕсемпе хресчен (фермер) хуçалăхĕсенче техникăна управа лартассипе республикăри смотр-конкурс ирттересси çинчен» пĕрлехи хушу тата район администрацийĕн пуçлăхĕ ку ыйтупа кăларнă йышăнусем пурнăçланнине пăхассипе тунти кун пĕрремĕш рейд ирттертĕмĕр. Тĕрĕслев серепинче «Оринино», «Восток», «Герой», «Свобода» хуçалăхсем пулчĕç. Хĕле парксенче пĕтĕмпех хатĕр тесе çирĕплетсе каламалли çак кун пулмарĕ. Çанталăк уяр тăрать те ĕлкĕрĕпĕр теççĕ-ши;
«Оринино» хуçалăхра техникăна хĕллехи управа лартассипе конкретлă тепĕр кун ĕçлемелли юлнă пулсан, ыттисенче паянах çанă тавăрса ĕçе кÿлĕнмелли ума тухрĕ. Апла пулсан та мехпарксенче ытларах шăплăх хуçаланать. Çапла вара ял хуçалăх техникин комплектлăхне пăхасси, парк территорисене тимĕр-тăмăртан тасатасси, ĕç хăрушсăрлăхĕн правилисене пăхăнассине йĕркелесси икĕ урапах уксахлать. Апла пулин те вырăнсенче техникăна чунĕпе парăннă механизаторсен пĕр пайĕ пуçарулăх кăтартсах техникăна управа лартассипе ĕçлеме тăрăшать. Çак тăрăшулăх 4 хуçалăхĕнче те курăнать. Ангарсене лартнă техникăна та, ятарлă вырăнсенче уçă вырăнтах хĕл каçмалли техникăна та ГОСТпа килĕшÿллĕн упрама лартассипе паянхи уяр çанталăкра пĕрле пулса пĕр-икĕ кун ĕçлемелле çеç, анчах...
«Восток» хуçалăхра эпир пынă кун С. Наумовпа Д. Быков механизаторсем парка пырса лартнă техникăна хĕле лартассипе ĕçлетчĕç. «Герой» хуçалăхра та механизаторсен пуçарăвĕпех тата кунта техникăна управа лартассипе пыракан ырă йăлапа хир карапĕсене тата ытти кăткăс техникăна хÿтлĕхе вырнаçтарнă, анчах урамра хĕл каçмалли техника патне алă çитсех кайман.
«Свобода» хуçалăхра техникăн пысăк пайĕ гаражсенче ларнăран тата хуçалăх ĕçченĕсем купăста касас, çĕртме сухи тăвас ĕçре пулнăран управа лартнă техникăна тепĕр хут пăхса тухма ĕлкĕрейменччĕ.
Кĕрхи типĕ те уяр кунсемпе усă курса техникăна хĕллехи управа лартас ыйтăва пурин те паянах вырăнтан хускатсан çитес çуркунне хамăрах çăмăл пуласси куçкĕрет.
С. НИКОЛАЕВ, патшалăх техника надзорĕн районти инспекторĕ;
А. БЕЛОВ, район хаçачĕн сотрудникĕ.