06 октября 2010 г.
Аслисем сывă пурнăç йĕркине тытса пыни ачасемпе çамрăксен куçне тÿрех курăнать. Çак ырă тĕслĕх ачасене воспитани парассинче чăнах та пысăк вырăн йышăнать.
Юлашки çулсенче ачасене те, аслисене те массăллă спорта явăçтарса сиенлĕ йăласенчен пăрăнма пулăшакан мероприяти районта чылай пулса иртет. Акă Муркаш район больницин тĕп врачĕн, Чăваш Республикин Патшалăх Канашĕн депутачĕн В. Г. Даниловăн парнисене çĕнсе илессишĕн шкул ачисем хушшинче йĕркеленĕ çăмăл атлетика ăмăртăвĕ те çавсен ретĕнчех.
Кăçалхипе иккĕмĕш хут иртрĕ çак ăмăрту Тойкилтĕре. Салам сăмахĕсемпе старт умĕн ăнăçу сунса чылаййăн хавхалантарчĕç ачасене: ăмăрту пуçаруçи В. Данилов, район администрацийĕн пуçлăхĕ Ю. Иванов, кунти ял тăрăхĕн пуçлăхĕ В. Любимова, ФСК директорĕ А. Куликов, Шупашкар хула депутачĕсен пухăвĕн депутачĕ Г. Данилов тата ытти нумай хăна. Ăмăртăва Олимп чемпионки Валентина Егорова килсе çитни вара ачасемшĕн пысăк савнăç пулчĕ (каярах вăл çĕнтерÿçĕсен дипломĕсене алă пусса «капăрлатрĕ»).
2000 çулта çуралнисенчен пуçласа 11 класра вĕренекенсем таранах хăйсен ÿсĕмĕсенче ăмăртса мала тухассишĕн пĕтĕм вăйран тăрăшрĕç. Юлашкинчен В. Егорова сĕннипе ĕртÿçĕсен чупăвĕ те хаваслăн иртрĕ.
Чи кĕтнĕ самант – парнесемпе чысласа дипломсемпе медальсем парасси – палăртнинчен ытларах та тăсăлчĕ. Мĕншĕн тесен кăçал спонсорсен йышĕ те пысăкланнă. «Моргаушскавтотехсервис» пĕрлешĕвĕн ертÿçи Л. Дмитриев, И. Никитин уйрăм предприниматель, В. Егорова ячĕллĕ спорт шкулĕ, ФСК директорĕ А. Куликов, Муркаш пасарĕн директорĕ Е. Субботин, Г. Михайлов уйрăм предприниматель, Чуманкасси ял тăрăхĕнчи Çĕньял Апаш ялĕнчи Васильевсен çемйи – кам кăна хатĕрлемен пулĕ хаклă парнесем. Çĕнтерÿçĕ командăсем – Калайкасси шкулĕ 1-мĕш вырăнта, Йÿçкасси шкулĕ 2-мĕш вырăнта, Ярапайкасси шкулĕ 3-мĕш вырăнта – хаклă парнесене тивĕçрĕç. Г. Данилов вара кашни командăна икшер торт парса хавхалантарчĕ. Владислав Григорьевич Тойкилтĕ шкулне футболла вылякансен пĕр команди валли футболкăсем парнелерĕ. Спонсорсем ăмăртăва йĕркелеме пулăшнăшăн шкул директорне И. Сергеева та, кунти ытти учительсене те тимлĕхсĕр хăвармарĕç. Вĕсем тăрăшнипех ăмăртăва килнĕ пĕр ача та вĕри апат çимесĕр киле каймарĕ.
Н. НИКОЛАЕВА.