01 сентября 2010 г.
Августăн 29-мĕшĕнче Михаил Игнатьев ЧР Президенчĕн тивĕçĕсене официаллă майпа пурнăçлама тытăнчĕ.
Михаил Игнатьев Чăваш Республикин Президенчĕн должноçне кĕнĕ май 2010 çулхи августăн 29-мĕшĕнче ЧР Патшалăх Канашĕн черетлĕ сессийĕ хыççăн савăнăçлă церемони иртнĕ. Йыхрав хучĕпе чĕннисем хушшинче РФ Федераци Пухăвĕн Патшалăх Думин депутачĕсем, ĕç тăвакан влаç органĕсен ертÿçисем, муниципалитет районĕсемпе хула округĕсен пуçлăхĕсем, Раççей субъекчĕсен представителĕсем, Чăваш Енĕн паллă çыннисем т. ыт. те пулнă. Церемоние ЧР Патшалăх Канашĕн Председателĕ Михаил Михайловский ертсе пынă. Унта çавăн пекех Раççей Федерацийĕн Президенчĕн федерацин Атăлçи округĕнчи полномочиллĕ представителĕ Григорий Рапота, Чăваш Республикин пĕрремĕш Президенчĕ Николай Федоров хутшăннă.
Михаил Игнатьевшăн чи пĕлтерĕшлĕ самантсенчен пĕри тăван халăхпа Конституци шанăçне тивĕçлĕ пуласси пирки тупа туни пулнă пулĕ. «Чăваш Республикин Президенчĕн полномочийĕсене пурнăçланă чухне Раççей Федерацийĕн Конституцине тата гражданин прависемпе ирĕклĕхĕсене хисеплеме тата пурнăçа кĕртсе пыма, Чăваш Республикин Президенчĕн пысăк тивĕçĕсене чыслăн пурнăçлама, халăхшăн шанчăклă ĕçлеме тупа тăватăп»,– тенĕ Михаил Игнатьев хăйĕн сăмахĕнче.
Çак сăмахсене Михаил Игнатьев Президент алă пусса çирĕплетнĕ. Михаил Михайловский Чăваш Енĕн çĕнĕ ертÿçи çине ЧР Президенчĕн тивĕç паллине çакса янă.
Чăваш Республикин Президенчĕн должноçне пурнăçлама пуçлани пирки Указа алă пуснă хыççăн Михаил Игнатьев сăмах илнĕ. Хăйĕн малашлăх тĕллевĕсене, ĕçĕсене палăртнă унта.
Çĕнĕ Президент тепĕр Указа та алă пуснă. Вăл Николай Федорова «Чăваш Республики умĕнчи тава тивĕçлĕ ĕçсемшĕн» орденпа наградăлани çинчен пулнă.
Савăнăçлă церемонире Чăваш Республикин пĕрремĕш Президенчĕ Николай Федоров та сăмах каланă. Вăл Михаил Васильевича паянхи тата малăшлăхри тĕллевсене пурнăçа кĕртсе пыма вăй, сывлăх, ăнăçу суннă май Чăваш Енĕн пуласлăхĕ тăван çĕре, халăха юратнин вăйĕнче пулнине аса илтернĕ.
Çав кун Николай Федоровăн кăкăрĕ тата тепĕр наградăпа – Чăваш Республикин Президенчĕн асăну паллипе пуянланнă.
Савăнăçлă церемони хыççăн Григорий Рапота, Михаил Игнатьев тата Николай Федоров журналистсен ыйтăвĕсене хуравланă. Инаугураци хыççăн Г. Рапота, М. Игнатьев тата федерацин Чăваш Республикинчи тĕп инспекторĕ Р. Тихонов РФ Президенчĕн Д. Медведевăн ЧР общество йышăнăвĕн пÿлĕмне уçма хутшăннă.