08 сентября 2010 г.
Вырăнти самоуправлени органĕсен суйлавĕччен вăхăт пĕр уйăх кăна юлать. Çак пысăк пĕлтерĕшлĕ кампанин хатĕрленÿ ĕçĕсен пĕр тапхăрĕ вĕçленчĕ темелле. Çак вăхăта депутатсен районти Пухăвĕн депутачĕсене, ял тăрăхĕсен пуçлăхĕсене, депутатсен ял тăрăхĕсенчи Пухăвĕсен депутачĕсене суйлама тăратнă кандидатсене регистрацилесе пĕтернĕ ĕнтĕ. Суйлав умĕнхи агитаци тапхăрĕ вăй илет.
Çавăнпа та районти территори суйлав комиссийĕн председателĕпе Африкан Вениаминович АНДРЕЕВПА тĕл пулнă май çитес суйлава хатĕрленсе туса ирттерекен ĕçсем пирки тĕплĕнрех каласа пама ыйтрăм.
– Африкан Вениаминович, кандидатсене регистрациленин итогĕсене пĕтĕмлетсе мĕн калама пултаратăр;
– Çапла, кандидатсене регистрацилемелли саккунпа пăхнă вăхăт тухрĕ. Депутатсен районти Пухăвне пирĕн 25 депутат суйламалла пулать пулсан, пĕтĕмпе депутат мандачĕшĕн 48 кандидат кĕрешĕве тухĕ. Ял тăрăхĕсен пуçлăхĕсене суйланас шухăшлисем ытти шайри кандидатсенчен ытларах. 16 ял тăрăхĕн пуçлăхне суйлама 58 кандидата регистрациленĕ. Депутатсен ял тăрăхĕсенчи Пухăвĕсен депутачĕсене суйлама 201 кандидата регистрациленĕ пулсан, пĕтĕмпе вĕсенчен 185 çынна суйласа илме тивĕ.
– Тепĕр ыйту та кандидатсене регистрацилени пиркиех. Ку тĕлĕшпе территори суйлав комиссийĕ хăш-пĕр кандидатсене ку е вăл сăлтавпа регистрацилемен тĕслĕхсем те пулчĕç-и;
– Паллах унсăр мар. Суйлава хатĕрленсе ирттернĕ май пур саккун та мĕнле пурнăçланса пынине çирĕп тĕрĕслесе тăрас пулать. Çапла вара хăйсен кандидатурисене депутатсен районти Пухăвĕн депутачĕ пулма сĕннĕ кандидатсенчен 3 çынна, ял тăрăхĕсен пуçлăхĕсем пулма сĕннĕ кандидатсене 4 çынна, депутатсен ял тăрăхĕсенчи Пухăвĕсен депутачĕсем пулма сĕннĕ кандидатсене 2 çынна регистрацилеме килĕшмен.
– Кандидатсене партисенчен те тăратрĕç, хăйсен кандидатурисене хăйсем сĕнекенсем те пулчĕç ĕнтĕ. Асăннă кандидатсен «партилĕхĕ» пирки мĕн каланă пулăттăр;
– Депутатсен районти Пухăвĕн депутачĕ пулма тăратнă кандидатсем 48-ăн терĕм. Вăл шутран «Пĕрлĕхлĕ Раççей» («Единая Россия») партирен тăратнисем 25, коммунистсен партийĕнчен тата «Справедливая Россия» партирен тăратнисем 3-шер, либераллă демократсен партийĕнчен тăратнисем 1 çын. 16-ăн хăйсен кандидатурисене хăйсем сĕннĕ.
Ял тăрăхĕсен пуçлăхĕсене суйламалли 58 кандидатран 16-шĕ «Пĕрлĕхлĕ Раççейрен», 5-шĕ компартирен, пĕри ЛДПР-тан, хăйсен кандидатурисене хăйсем сĕннисем 36 çын.
Депутатсен ял тăрăхĕсенчи Пухăвĕсен депутачĕсене суйлама тăратнă 201 кандидат хушшинче «Пĕрлĕхлĕ Раççей» партирен 185, КПРФ-ран 5, ЛДПР-тан 1, хăйсен кандидатурисене хăйсем сĕннисем 10 кандидат.
– Хальхи хатĕрленÿ ĕçĕсем пирки çĕнни мĕн пур;
– Çак вăхăта вырăнсенчи суйлав участокĕсен членĕсене çирĕплетес ĕçсем пыраççĕ. Суйлав участокĕсен председателĕсене хамăрăнах палăртмалла пулать. Председателĕн çумĕпе суйлав участокĕн секретарьне вара вăрттăн сасăласа суйлав участокĕн йĕркелÿ ларăвĕнче палăртĕç.
Вырăнти самоуправлени органĕсен кандидатсен хăйсен суйлавçисемпе тĕл пулмалли вырăнсене палăртмалла пулать. Тĕл пулусен графикĕсене районти комисси туса хатĕрлет. Кунпа пĕрлех агитаци материалĕсене хăш вырăнсенче вырнаçтарассине те территори суйлав комиссийĕ палăртать. Халĕ кунсăр пуçне суйлав комиссийĕ суйлавçăсен списокĕсене хатĕрлет, миграци служби паракан кăтартусемпе хушăмсене кĕртет. Сентябрĕн 19-мĕшĕ тĕлне списоксем хатĕр пулмалла.
Пĕр сăмахпа хатĕрленÿ ĕçĕсем чи хĕрÿ тапхăрта.
В. ШАПОШНИКОВ
калаçнă.