25 сентября 2010 г.
Воспитатель кунĕ пирĕн пурнăçа тахçанах кĕнĕ уяв мар. Апла пулин те вăл хĕрарăмсен çуркуннехи уявĕ пекех черчен уяв. Ырă кăмăл, чун ăшши, чăтăмлăх, иксĕлми юрату – çак туйăмсене парнелеççĕ садикра ĕçлекенсем ачасене.
16 ача сачĕ, 5 пуçламăш шкул-ача сачĕ, шкулчченхи 4 ушкăн тата пĕтĕмĕшле пĕлÿ паракан шкулсем çумĕнчи кĕске вăхăтпа ĕçлекен 4 ушкăн – 2010–2011 вĕренÿ çулĕнче вĕсене пурĕ 1499 ача çÿрет. Ку пĕлтĕрхинчен нумайрах пулни савăнтарать.
Сентябрĕн 1-мĕшĕ тĕлне вара пирĕн районта шкул çулне çитмен 2299 ача пулни паллă. Çапла вара çулталăк çурăчченхи ачасене шута илсен те садиксене пур ачана та çÿреттерме, шел пулин те, майсем çителĕксĕр. Çапах та çулсерен хушма ушкăнсем уçма майсем тупни те лайăх пулăм. Акă юлашки çулсенче «Путене», «Колокольчик», «Радуга» ача сачĕсенче хушма ушкăнсем уçăлчĕç. Очăкассинчи шкула пуçламăш шкул – ача сачĕ туса хунăран кунта тепĕр 2 ушкăн ĕçлеме тытăнчĕ. Социаллă объектсемпе эффективлă усă курас тĕллевпе Яракри Культура çуртĕнче Катькасри пуçламăш шкул – ача сачĕн филиалĕ уçăлчĕ.
Ача садика çÿренĕшĕн ашшĕ-амăшĕ пĕр уйăхра 400-500 тенкĕ тÿлет. Çакă ытла пысăк сумма мар.
Паянхи кун тĕлне çÿлерех асăннă учрежденисенчи ушкăнсем тĕрлĕ вăхăтпа ĕçлеççĕ: талăкĕпе ĕçлекеннисем те, 12 тата 10 сехет, 6 тата 5 сехет ĕçлекеннисем те.
Ача сачĕсенче ĕçлекен 166 педагогран 112-шĕ аслă пĕлÿллĕ. Чылай педагог хальхи вăхăтра та вĕренĕвне малалла тăсать. Хăйсен квалификацине ÿстерессипе те педагогсем çулсерен тăрăшаççĕ. Акă 2010–2011 вĕренÿ çулĕнче аттестациленме 52 воспитатель заявлени çырса панă.
Ăсталăха пысăк шайра тытса пырас тата ÿстерес тĕллевпе районта тĕрлĕ методпĕрлешÿсем ĕçлеççĕ. Вĕсем вара тĕрлĕ енлĕн пулса пыраççĕ: семинарсем, практикумсем, докладсем тата ытти те.
Пĕр-пĕрин ăнтăлăвне, ĕçне, ăнăçăвне курса ĕнтĕ воспитательсем кашни çулах тĕрлĕ грантсене çĕнсе илессипе конкурссене активлă хутшăнаççĕ. 2007 çултанпа О.В. Прокопьева («Солнышко»), О.Г. Петрова («Солнышко») тата Н.А. Порфирьева («Путене») Чăваш Республикин Президенчĕн хавхалантару укçине илме тивĕç пулчĕç.
Ачасене аталантарма кашни садикрах условисене лайăхлатса пыратпăр. Кăçал «Солнышко», «Березка», «Мечта», «Василек» тата ытти хăш-пĕр садиксен ертÿçисем çак ыйтупа уйрăмах тимлĕ ĕçлерĕç.
Ача сачĕсенче тăван тавралăхăн историйĕпе, культурипе, йăли-йĕркисемпе паллаштарассипе япăх мар ĕçлесе пыраççĕ. Çапла вара ачасем чăвашлăх пирки пĕчĕкренех пĕлсе ÿсеççĕ. Сывлăха пĕчĕкренех упрасси çине те садиксенче тимлĕх уйăраççĕ. «Малышиада» ăмăрту та кашни çулах интереслĕ иртет.
Вĕрентÿ округĕсем (пурĕ 4) те иртнĕ çулта аван ĕçлерĕç. Г.А. Шолкова, Н.Г. Колбасова, Н.В. Герасимова тата Р.Г. Шапошникова – округсене ертсе пыракансем ачасен пурнăçĕ савăнăçлă та асра юлмалла пултăр тесе тăрăшаççĕ.
Уйрăмах лайăх ĕçлекенсене уяв умĕн ятран асăнсан та килĕшÿллĕ пуль. Вĕсем: Р. Гусева («Солнышко»), Р. Андреева («Путене»), В. Казакова («Мечта»), И. Андриянова («Березка») воспитательсем, Р. Максимова («Солнышко»), В. Паршева («Колокольчик») поварсем, Е. Бочкарева («Мечта») кĕçĕн воспитатель тата ыттисем те. Уяв ячĕпе пур ĕçтеше те чĕререн саламлатпăр, ĕçре ăнăçу, лайăх ачасем пулччăр, ашшĕ-амăшĕ сире хисеплетĕр. Ĕмĕтсене пурнăçа кĕртме çирĕп сывлăх пултăр.
В. РОМАНОВА,
район администрацийĕн вĕрентÿ,
çамрăксен политики тата физкультурăпа спорт пайĕн методисчĕ.