25 сентября 2010 г.
Çĕр улми те саккунлăха юратать
Кăçал çĕр улми хăйĕн тухăçĕпе ытлашши савăнтармарĕ пулин те, тутлăлăхĕ енчен пĕрре те япăх мар. Çавăнпах «иккĕмĕш çăкăра» çителĕклĕ хатĕрлесе хурас текенсем те тĕрлĕ майсем шыраççĕ.
Акă Шупашкарта пурăнакан арçын Мемеккасси ялĕнчи пĕр киле хуçисем çук чухне алăк çăрине çĕмĕрсех кĕрет. Пÿртре ăна нимĕн те интереслентермен, вăл тÿрех тĕп сахайне чăмать. Унти 650 килограма яхăн çĕр улмие хăвăрт «уралантарать». Хальхи хаксемпе шутласан кил хуçисене кÿнĕ тăкак пĕчĕк мар – 13 пин тенкĕ. Уголовлă кодексри 158 статйи те «йÿнех» пулмĕ.
20 минутра – укçа та, статья та
ĕçлесе илме ĕлкĕрет пĕр «пултаруллă» çын. Шăпах çак вăхăт хушшинче Муркашри лавккасенчен пĕринче вырнаçтарнă терминалти укçана вăрлать вăл. Пасар кунĕнче кăнтăрлахи вăхăта суйласа илет вăрă: çын нумай, лавккара кĕшĕлтетнĕ чух ăна никам та асăрхамĕ тенĕ ĕнтĕ. Çапла майпа вăл терминал ещĕкĕнче пухăннă 4390 тенкĕ укçана пĕçертсе тухать. Çак ĕçпе халĕ следстви пырать.
Сутуçă явап тытнă
Сутă лайăх тума пĕлекенĕн укçи те кашни сехетрех килсе тăрать мĕн. Акă Москакассинче пурăнакан 54 çулхи арçынна та чăн-чăн сутуçă теме май пур. «Суррогат» операци вăхăтĕнче тупса палăртаççĕ ăна. Явапне те тыттараççĕ.
Уйкас Хачăк арçынни çакăн патне кăнтăрлачченех эрех илме пырать. Çур литршăн 100 тенкĕ парать. «Хакĕ темех мар, спирчĕ пултăр шĕвекре». Тепĕр сехетрен арçын татах эрех «ĕçме» пырать: 400 грамшăн 50 тенкĕ кăларса хурать. Сехет иртнĕ хыççăн çак шĕвеке туянма каллех çавăнта çитет. Пĕрисен килĕнче макăру, теприсен – енчĕк хулăмланса пырать.
Хăвăра палласа илтĕр-и, ялсенче «телей» валеçекенсем; Ан манăр: явапĕ сирĕн валли те çитĕ.
Пичете районти шалти ĕçсен пайĕн материалĕсем тăрăх хатĕрленĕ.