Публикации » Ĕçĕсемпе паллашма кăмăллă

22 сентября 2010 г.

«Ударник» хуçалăхăн Панклири сĕт фермин коллективне пĕрремĕш çул мар ĕнтĕ Лина Николаевна Трофимова ертсе пырать. Хăйĕн ĕç ĕмĕрне ачаранах выльăх-чĕрлĕх отраслĕпе çыхăнтарнă хĕрарăм паян хăйне шанса панă участокра ответлăха туйнипе палăрса тăрать. Хăйĕн яваплăхĕпе ыттисемшĕн те тĕслĕх пулса тăрать. Шкул хыççăнах Суворов ячĕпе хисепленекен хуçалăхăн Анаткассинчи сĕт ферминче дояркăра вăй хунăскер выльăхсене юратнипех Вăрнарти ял хуçалăх техникумне ветеринара вĕренме каять. Унтан вĕренсе тухнăранпа тенĕ пекех Лина Николаевна «Ударник» хуçалăхра. Юлашки çулсенче вăл Панклири сĕт фермине ертсе пырать. Ферма хĕле хатĕрпе пĕрех пулнине пĕлсен пурнăçне выльăх отрасльне халалланă хĕрарăмăн ертÿçĕ пултарулăхĕ те уксахламанни сисĕнчĕ. Чăн-чăн ĕçченĕн çапла пулмалла та.

Авăн уйăхĕн 24-мĕшĕнче районти выльăх-чĕрлĕх пăхакансемпе çак отрасль аталанăвĕшĕн яваплă пулса тăракансем пĕрле пухăнса район администрацийĕн ял хуçалăх пайĕ ертсе пынипе сĕт фермисем хĕле епле хатĕрленнине пăхса тухĕç. Вĕсем кашни хуçалăхăн ферминчех пулса ĕçсене хак парĕç. Пĕтĕмлетÿ «Оринино» ял хуçалăх производство кооперативĕнче иртĕ.

Анатолий БЕЛОВ.