31 июля 2010 г.
Ял хуçалăхĕнче вăй хураканăн çĕр ĕçĕнче пĕр тапхăр тепринпе сисĕнмесĕрех улшăнса пырать. Пĕрле илсен вара çак çыхăну хуçалăхсен экономикине йĕркелет. Кам кун таппинчен юлмасăр ĕçлесе пырать – вăл ыранхи куна та шанчăклăрах пăхайрать.
«Восток» ял хуçалăх производство кооперативĕн хирĕсенче ирлесех ĕç шавĕ тăрать. Тĕрĕссипе вăл çĕрле те чарăнмасть темелле. Хуçалăхăн виçĕ «хир карапĕ» районта пуринчен малтан кĕрхи культурăсене вырса пĕтерсе кÿршĕллĕ «Оринино» хуçалăха пулăшу кÿчĕ. Паян вĕсем тăрăшсах çуртрисене пухса кĕртессипе ĕçлеççĕ. Кунта та ĕçсем вĕçленсе пыраççĕ темелле.
Хуçалăх вырма тесе пиçсе çитнĕ тырă-пулăна хиртен пухса кĕртессипе çеç тимлемест. Ыранхи куна пăхса Мулкачкассисем паянах çĕртме сухи тăвассипе тимлеççĕ. Ĕнерхи кун тĕлне çĕртме сухине районĕпе 35 гектар тунă пулсан, «Восток» кооперативра ăна 25 гектар çинче сухалама ĕлкĕрнĕччĕ те ĕнтĕ. Эпир хирсене çитнĕ чух пĕр уйра Димитрий Быков механизатор юлашки лаптăка сухалатчĕ. «Вăхăчĕ çавнашкал. Кашни ĕçех вăхăтра ĕлкĕрмелле. Паян епле ĕçлĕпĕр – ыран çапла пурăнăпăр», – терĕ самантлăха чарнă Т-150 тракторне вырăнтан хускатса çамрăк механизатор.
Тепĕр уйра вара Алексей Артемьевпа Александр Пушкин хăйсене шанса панă МТЗ-82 тракторсемпе касă хыççăн касă суха тăватчĕç. Хуçалăх ертÿçипе Михаил Шишокинпа кооперативăн тĕп агрономне Зоя Степановăна шăпах суха кассисен пуçламăшĕнче тĕл пултăмăр та.
Хуçалăхра ĕçсем пĕри тепринпе тачă çыхăнура пулни тата ĕçсем пур вăйсене те пĕрлештерни пире те савăнăç парнелерĕ.
А. БЕЛОВ, район хаçачĕн экономикăпа экологи пайĕн ертÿçи;
Т. АЛЕКСЕЕВА, ял хуçалăх пайĕн тĕп специалист-эксперчĕ.