21 июля 2010 г.
Районти ял хуçалăх производство кооперативĕсемпе хресчен (фермер) хуçалăхĕсемшĕн кăçал вăрăма тăсăлнă шăрăх кунсем нумайлăха асра юлĕç. Агротехникăна пăхăнасси пуш сăмах маррине кăçал кашниех хăйĕн тĕслĕхĕнче курса кÿршĕсеннипе танлаштарайрать.
Шăрăх çанталăка пула хресчен пучах тулса çитеймен хирти тырă-пулăн пысăк пайне выльăх апачĕ янтăлама уйăрчĕ. Çапла вара кăçалхи вырмара районти çĕр ĕçченĕн шăрăхран сыхланса юлнă 7001 гектар çинчи тырă-пулăна пуçтарса кĕртмелле. Кунта технологие пăхăнса тирпейлĕ ĕçлени – çухатусене май пур таран пĕчĕклетмелли çул-йĕр.
Утă уйăхĕн 20-мĕшĕ тĕлне районти хуçалăхсем вырмана тухрĕç ĕнтĕ. Вăтам тухăç хальлĕхе гектар пуçне 10-11 центнертан иртмест.
Асăннă кун тĕлне хирсенче пĕтĕмпе 22 «хир карапĕ» ĕçленĕ. Вырма ĕçĕсем, тĕпрен илсен, кĕрхи культурăсен пуссисенче сарăлнă. Кĕртрисен уйрăмах пысăк лаптăкĕсем Суворов ячĕпе хисепленекен (338 гектар), «Свобода» (202 гектар), «Ударник» (182 гектар), Чапаев ячĕпе хисепленекен (120 гектар) хуçалăхсенче.
Район администрацийĕн ял хуçалăх пайне тăратнă оперативлă кăтартусемпе ĕнерхи кун тĕлне тĕрлĕ харпăрлăх формиллĕ хуçалăхсем вырмана 857 гектар çинче пурнăçланă. «Восток» хуçалăхра 15 гектар, чăх-чĕп фабрикинче 29 гектар çинчи кĕрхи тулăна вырас ĕçе вĕçленĕ. Кĕрхи тулăна 54 гектар çинче вырса пĕтерсе «Орининсем» ыраш пуссине тухнă. Кунти ĕçсене 90 гектар (53 процент) пурнăçланă.
Ыранхи куна пăхса ĕçлекенсем «хир карапĕсем» хыççăнах улăм пуçтарассине йĕркеленĕ. «Волга», Чкалов ячĕпе хисепленекен, Ильич ячĕпе хисепленекен хуçалăхсемпе «Моргаушская» чăх-чĕп фабрики» уçă акционерлă обществăра вырма ирттернĕ лаптăксенчи пĕтĕм улăма çийĕнчех пуçтарса пыраççĕ.
Вырма кунсерен вăй илнĕрен «хир карапĕсем» йышăннă каçалăксем те сарлакарах та сарлакарах.
А. БЕЛОВ.