10 июля 2010 г.
Пĕлетпĕр ĕнтĕ, кăçалхи октябрĕн 14–25-мĕшĕсенче Пĕтĕм Раççейри халăх çыравĕ иртмелле. Çак пысăк пĕлтерĕшлĕ мероприятие хатĕрленес ĕçсем районта анлă сарăлнă. Ку енĕпе Раççей Федерацийĕн миграци службин районти территори пункчĕн ĕçченĕсем умĕнче тăракан задачăсем те пĕчĕк мар. Вĕсем пирки асăннă пункт пуçлăхĕ Зоя Михайловна СОРОКИНА каласа пама кăмăл турĕ:
– 2002 çулхи январĕн 25-мĕшĕнче йышăннă «Пĕтĕм Раççейри халăх çыравĕ çинчен» 8-ФЗ " Федераллă саккуна тата Раççей Федерацийĕн Правительствин 2006 çулхи январĕн 11-мĕшĕнчи 7-р " йышăнăвне тĕпе хурса, 2010 çулхи октябрь уйăхĕнче черетлĕ халăх çыравне хатĕрленсе ирттерессипе ĕçсем анлă сарăлнă.
Чăваш Республикин Министрсен Кабинечĕн 53-р " йышăнăвĕпе килĕшÿллĕн ĕç тăвакан ытти влаç органĕсемпе пĕрлех Раççей Федерацийĕн миграци службин Чăваш Республикинчи управленийĕ умĕнче те çынсене шута илессипе пысăк задачăсем тăраççĕ. Çакă вăл чи малтанах патшалăхăн ытти влаç органĕсене, вырăнти самоуправлени органĕсене тата суйлав комиссийĕсене Раççей Федерацийĕн гражданĕсене çĕнĕ паспорт пани е улăштарса пани пирки оперативлă сведенисемпе тивĕçтерсе тăма кирлĕ. Граждансене вырăнта пурăннă пирки регистрацилени те çакăнтах кĕрет. Çак задачăна татса пани пĕр енчен патшалăх влаç органĕсемпе вырăнти самоуправлени органĕсен йышăнăвĕсен тĕллевлĕхне çирĕплетет, тепĕр енчен заявительсем тĕлĕшпе те пĕлтерĕшлĕ пулса тăрать.
Чăваш Республикин Министрсен Кабинечĕ граждансемпе должноçри çынсем хăйсем пулнă е пурăннă вырăнта регистрацие тăмалли тата регистрацирен тухмалли правилăсене мĕнле пăхăннине тĕрĕслесе тăма сĕнет. Çавна май 2010 çулхи 5 уйăхра ку енĕпе 91 тĕрĕслев ирттертĕмĕр.
Кунпа пĕрлех асăннă мероприятисене ирттернĕ чухне ăнлантару ĕçне туса пырасси пирки те манмастпăр. Çапах та йĕркене пăсакансем тĕлĕшпе тивĕçлĕ мерăсем йышăнма тивет. Паспортпа регистраци учечĕн правилисене пăснăшăн çак тапхăрта Раççей Федерацийĕн 199 гражданне административлă майпа айăпланă. Районта пурăнакансене 1892 çынна учета илнĕ тата учетран кăларнă, Раççей гражданинĕн паспорчĕсене 932 çынна панă.
Миграци лару-тăрăвне статистика тĕлĕшĕнчен тĕрĕслесе тăрассипе миграци службин органĕсем РФ гражданĕсене регистраци учетне илнĕ тата учетран кăларнă чухне статистика учечĕн хучĕсене патшалăх статистикин органĕсене параççĕ. Статистика учечĕн хучĕсене вăхăтра тата пахалăхлă тăратни килсе кĕнĕ тата тухса кайнă çынсем пирки тулли информаци илме май парать.
Çавăнпа пĕрлех программăпа техника хатĕрĕсене аталантарассипе те ĕçсем пыраççĕ. Çакă граждансен регистраци учечĕн ĕçне автоматизацилеме май парать. Хальхи вăхăтра Раççей миграци службин пур территори подразделенийĕсенче те Раççей Федерацийĕн гражданĕсене регистрацилес тата регистраци учетĕнчен кăларас ĕçсене электронлă майпа туса пыраççĕ.
Массăллă информаци хатĕрĕсем урлă çуралнă ачасене вăхăтра регистрацилемелли, çынсене хăйсем пулакан тата пурăнакан вырăнсенче кая юлмасăр регистрациленмелли пирки асăрхаттарсах тăратпăр. Районти ЗАГС пайĕпе те çыхăнса ĕçлесе пыратпăр. Вилнĕ çынсене регистраци учетĕнчен хăй вăхăтĕнче кăларатпăр.
Пĕтĕм Раççейри çитес халăх çыравĕ валли район территорийĕнче пурăнакансем тĕлĕшпе май пур таран туллинрех те тĕрĕсрех информаци хатĕрлес тесе паспортпа регистраци правилисене епле пăхăннине тĕрĕслесех тăратпăр. Унăн итогĕсем пирки информацие патшалăх статистикин районти уйрăмне паратпăр.
В. ШАПОШНИКОВ
калаçнă.