07 июля 2010 г.
Вăхăт иртет, анчах та шалти ĕçсен пайĕ пур тапхăрта та йывăрлăхсене çĕнтерсе ума лартнă тĕллевсене пурнăçласа пынă. Ку паян та çаплах. Ветерансем никĕсленĕ ырă йăла-йĕркене малалла тăсса тивĕçе таса чун-чĕрепе пурнăçласси кашни сотрудникшăн тĕп вырăнта пулмалла. Çакăн çинчен каларĕ те районти шалти ĕçсен пайĕн пуçлăхĕ Е.И. Плечов уяв мероприятийĕнче.
Иртнĕ шăмат кун, июлĕн 3-мĕшĕнче, Муркашри Культура çуртне милици ĕçченĕсем те (паллах, службăран пушаннисем çеç), районти предприяти-организацисен ертÿçисем те, чĕннĕ хăнасем те йышлăн пухăнчĕç. Уяв чăннипех те уяв пулчĕ темелле. Саламлă тата тав сăмахĕ калас текенсем сцена çинче пĕр-пĕрне ылмаштарсах тăчĕç. Акă район администрацийĕн пуçлăхĕпе Ю. Ивановпа унăн çумĕ В. Калинин та пысăк парнепех çитрĕç уява. Ытти хăнасем те асăнмалăх хаклă парнесем парса саламларĕç районти шалти ĕçсен пайне.
Чи пăлхануллă та кĕтнĕ самант вара милици ĕçченĕсене тата йĕрке хуралçисене кулленхи ĕçре пулăшса пыракансене асăнмалăх хаклă парнесем, Хисеп грамотисемпе Тав çырăвĕсем, юбилей медалĕсемпе хавхалантару парнисем парса чыслани пулчĕ.
Акă районти шалти ĕçсен пайĕн милицин участокри уполномоченнăйĕсен уйрăмĕн пуçлăхĕ Илья Иванович Петров та ятарлă парнепе юбилей медальне тивĕçрĕ. Чăваш Республикин шалти ĕçсен министрĕн приказĕпе Николай Меркурьевич Цветкова – оперативлă дежурнăя – «За верность долгу» паллăпа наградăларĕç, Вениамин Михайлович Максимовăн – штаб пуçлăхĕн – ĕçне Хисеп грамотипе палăртрĕç.
Ветерансене уява йыхравлани, паллах, вĕсен сумлăхĕпе ĕçне паян та мала хунине калать. Чăваш Республикин шалти ĕçсен пайĕн ветерансен канашĕн ертÿçи М.Ф. Киселев панă канашсем вара çамрăк сотрудниксемшĕн уйрăмах вырăнлă пулчĕç.
Уяв мероприятине вĕçленĕ май Евгений Иванович сăмахĕсем темĕнле пулсан та ĕç çинех куçрĕç. Мĕнех, ĕçĕ çапларах вĕсен – йĕрке хуралçисен: уяв саманчĕсем кĕске. Кăçалхи çур çулта районти шалти ĕçсен пайĕ хăйĕн тĕллевĕсене еплерех пурнăçлани тата йĕрке тĕлĕшпе районта мĕнлерех лару-тăру пулни çинчен çитес номерте паллашма пултаратăр.
Н. НИКОЛАЕВА.