03 июля 2010 г.
Республикăри çамрăк армеецсен 42-мĕш вăййисене иртнĕ кĕçнерни кун хупнă чухне Чăваш Республикин вĕрентÿ, çамрăксен политикин министрĕн çумĕ В.В. Алексеев малашне çак вăйăсене тата та пахарах, интереслĕрех, туллирех ирттерме май пуррине пĕлтерчĕ. Çамрăк армеецсене вăйăсем вĕçленнĕ ятпа саламланă май Виктор Валерьевич ачасем вăйăсен малтанхи 2 кунĕнчех çанталăк кăларса тăратнă чăрмавсене те, конкурссенчи йывăрлăхсене те чыслăн чăтса ирттернине палăртрĕ.
– Çак Аслă Çĕнтерÿ 65 çул тултарнă, Чăваш автономийĕ 90 çул тултарнă çулхи вăйăсене эсир яланах асра тытăр. Мĕншĕн тесен çак 6 кун хушшинче эсир пурнăç йывăрлăхĕсене çĕнтермеллин, туссемпе хутшăнма вĕренмеллин, пурнăçра ушкăнпа мĕнле пурăнмаллин чăн-чăн шкулĕ витĕр тухрăр, – терĕ район пуçлăхĕ Ю.А. Иванов хăнасене Муркаш районĕнче пурăнакансен ячĕпе саламланă май.
Уявра мала тухнă командăсене чысларĕç. Муркаш шкулĕ çумĕнчи «Родина» çарпа патриотика клубĕ ытти клубсем хушшинче çĕнтерÿçĕ пулса тăчĕ. Чăваш Республикин Президенчĕн ятарлă парнине вара Оринин шкулĕн команди тивĕçрĕ. Асăннă вăйăсем кăçал Учитель çулталăкĕнче иртнĕ май «Учитель-наставник» ятпа çĕнĕ конкурс пулчĕ. Вăйăсене хупнă чух унăн çĕнтерÿçисене, çавăн пекех «Зарницăпа» «Орленока» пĕрремĕш хут хутшăнакансене, хăйсен çуралнă кунĕсене çак 6 кун хушшинче паллă тунисене те чысларĕç. Вăрнарти çарпа патриотика клубĕн çапăçмалли мелсене кăтартса уçнă уяв Чăваш Республикин Шалти ĕçсен министерствин ятарлă отрячĕн çапăçу мелĕсене кăтартнипе тата Шупашкарти аэроклуб парашютисчĕсемпе Муркаш шкулĕн «Родина» çарпа патриотика клубĕн членĕсем-парашютисчĕсем парашютпа сикнипе вĕçленчĕ.
Л.ПАВЛОВА.