15 мая 2010 г.
«Çĕнĕлĕхсене алла илмесĕр ял хуçалăхне тухăçлă аталантарасси иккĕленÿллĕ», – терĕ хирте ĕçлекенсем патĕнче пулнă хыççăн унта çĕр улми лартассипе ĕçсем епле пынине пĕтĕмлетсе «ВаСем» чикĕллĕ яваплăхлă общество ертÿçи В. Кондратьев.
Эпир хире çитнĕ çĕре кăнтăр апачĕ те çывхаратчĕ. «Иккĕмĕш çăкăр» пуссинче вара хĕрÿ ĕç пырать. Кашни ĕçчен, агрегат хăйĕн ĕçне пĕлсе пурнăçлани инçетри тÿперенех курăнчĕ. Уйрăмах пысăк калăпăшлă кустăрмаллă трактор хирте унталла-кунталла хăвăрт çÿрени тĕлĕнтерчĕ. Çывăха пынăçемĕн ĕç шавĕн сасси ÿсрĕ кăна.
– Çур акире кăçал пирĕн пĕтĕмпе 600 гектара яхăн ял хуçалăх культурисем акмалла-лартмалла. Хуçалăх акана хатĕр кĕтсе илчĕ. Ăна хатĕрленсе «Нью Холланд» кустăрмаллă трактор туянтăмăр. Унăн пулăшăвĕпе пĕрремĕш меллĕ кунпах хире тухрăмăр, – каласа парать куçне уй инçĕшĕнчен илмесĕр ют çĕр-шыв трактор штурвалне алла илнĕ Алексей Матвеев механизатор. – Çурхи кун вăл пире кĕтмест, çĕр ĕçченĕн хăйĕн çут çанталăк ыйтнипе тата вăл паракан условисемпе тан пыма тăрăшмалла. Пирĕн кашнийĕнех çурхи уй-хирти ĕç планĕсем паллă.
Хуçалăх ертÿçи çак кунсенче хиртен каймасть, кашни ĕçе хăй йĕркелеме тăрăшать.
– Çĕр улмине малтан 60 гектар лартма планланăччĕ пулсан, вăрлăх çитсе пынине кура унăн лаптăкне 70 гектара çитерес тĕллев çуралчĕ. Ÿсен-тăрана сеттер кÿрекен чир-чĕрпе тата сăтăрçăсемпе кĕрешессине те паянах пурнăçа кĕртсе пыма тăрăшатпăр, – каласа ăнлантарать Юнкă ял тăрăхĕн çĕрĕсем çинче икĕ çул каялла йĕркеленнĕ «ВаСем» чикĕллĕ яваплăхлă общество ертÿçи В. Кондратьев минераллă удобрени сапакан А. Илугинĕçĕ çине кăмăллăн пăхса.
– Тулли хăватпа ĕçлеме пур условисем те пур. Çурхи кун çулталăк тăрантарнине шута илсе хăвăртрах акса-лартса пĕтермелле çеç. Тулли кунпа ĕçлеме механизаторсем (ытларахăшĕ çамрăксем) çитни те хавхалантаракан пулăм, – терĕç çĕр улми лартнă çĕрте ĕçлекен Ю. Терентьев, И. Соколов, Л. Мешков, А. Илугин тата А. Самушков.
«Иккĕмĕш çăкăр» пуссинчен пирĕн автомашина тапранса тухрĕ. Çĕр хатĕрлекен тата çĕр улми лартакан агрегатсем хыçĕнче тăракан тусан инçене каять. Çÿлте тăракан хĕвел вара çурхи кашни сехетпе туллин усă курма ыйтать.
А. БЕЛОВ.