05 мая 2010 г.
Майăн 1-мĕшĕнче Çуркуннепе Ĕç уявĕ Муркашсемшĕн Спорт уявĕ те пулчĕ. Йăлана кĕнĕ тăрăх çав кун районта çуллахи спорт сезонне уçрĕç. Ăмăртăва хутшăнакансем Муркаш райповĕн парнисене çĕнсе илессишĕн тупăшрĕç. Уяв программи вара Муркашри искусство шкулĕнче вĕренекенсен илемлĕ ташшипе пуçланчĕ. Пуçтарăннисене çак виçĕ уяв ячĕпе саламланă май район пуçлăхĕ Ю.А. Иванов ку мероприяти тепĕр уяв – Аслă Çĕнтерÿ 65 çул тултарас умĕн пулса иртнине палăртрĕ.
Ĕç тата вăрçă паттăрĕсемпе тан пулма тăрăшăр, – терĕ Юрий Александрович, ăмăртăва хутшăнакансене трасса çинче ăнăçу суннă май.
Пуçтарăннисене çавăн пекех Муркаш райпо Канашĕн ертÿçи Б.В. Андреев, Чăваш Республикин Патшалăх Канашĕн депутачĕ, районти тĕп больницăн тĕп врачĕ В.Г. Данилов, Муркаш ял тăрăхĕн пуçлăхĕ Н.И. Никитин саламларĕç.
Республикăри спортсменсем хатĕрлекен ятарлă ачасемпе çамрăксен спорт шкулĕн ертÿçи О.И. Андреев республика, Раççей шайĕнчи спорт аталанăвне Муркаш районĕ пысăк тÿпе хывнине палăртрĕ. Хăвăрт утассипе иртекен çитес Тĕнче Кубокĕнче те Муркаш районĕнче çуралса ÿснĕ Вера Соколова, Петр Трофимов, Нина Охотникова пĕрлештернĕ командăра республика, çĕр-шыв чысне хÿтĕлеççĕ. Вăл асăннă спортсменсен тренерĕсене А.В. Васильевпа И.В. Смирнова маттур спортсменсем хатĕрленĕшĕн тав турĕ.
Старта çак кун чи малтан çемье командисем тухрĕç. Ăмăртăва хутшăннă 6 çемьерен чи правурри Йÿçкасси ял тăрăхĕнчи Вăрманкассинчи Романовсен çемйи (сăн ÿкерчĕкре) пулчĕ. Маринăпа Сергей Романовсем ывăлĕпе Кольăпа чупрĕç çак кун. Оринин ял тăрăхĕнчи Вăрманкассинчи Оксанăпа Алексей Прокопьевсем хĕр ачипе Юльăпа 2 вырăн йышăнчĕç.
Москакассинчи Людмилăпа Евгений тата вĕсен хĕр ачи Екатерина киле 3 вырăнпа таврăнчĕç.
Çуллахи спорт сезонне уçнă çĕре 24 шкул команди хутшăнчĕ. Пĕтĕмĕшле пĕлÿ паракан тĕп шкул командисенчен Тойкилтĕсем чи çивĕччисем пулчĕç. Кашмашсемпе Шетмĕпуçсем 2 тата 3 вырăнсене пайларĕç.
Çакна палăртмалла, ку ăмăртура «Единая Россия» политика партийĕн вырăнти организацийĕ хавхалантару парнине çирĕплетрĕ. Ăна тĕп шкулсенчен 4 вырăна тухнă Сосновка шкулĕн команди тивĕçрĕ.
Вăтам шкулсен командисен хăйсен çĕнтерÿçисем. Чи малтанах финиша Калайкасси шкулĕн команди çитрĕ. Ун хыççăн ăмăртăва Йÿçкассисем вĕçлерĕç. 3 вырăна вара Ярапайкассисем тухрĕç. 4 вырăна тухнă Муркаш шкулĕн команди хавхалантару парнине илчĕ.
Физкультура коллективĕсен командисем пĕтĕмпе 4 пулчĕç. Ăмăрту хуçисем кубока хăйсенчех хăварчĕç: Муркаш райповĕн команди çĕнтерÿçĕ пулчĕ. 2 тата 3 вырăнсене «Муркашри чăх-чĕп фабрики» акционерсен уçă обществин тата «Свобода» хуçалăхăн командисем йышăнчĕç. Хавхалантару парни 4 вырăнти шалти ĕçсен пайĕн командине лекрĕ.
Çĕнтерÿçĕ-командăсем çак кун кубокпа дипломсене, хаклă парнесене тивĕçрĕç, 2 тата 3 вырăнсене тухнисем – дипломсемпе парнесене.
Юлашкинчен Борис Васильевич ăмăртăва хутшăнакансене тÿлевсĕр кăнтăр апатне чĕнчĕ.
Л. ТУКТИНА.