07 апреля 2010 г.
Чăваш Республикин Министрсен Кабинечĕн 2009 çулхи декабрĕн 25-мĕшĕнчи йышăнăвĕпе килĕшÿллĕн каникул вăхăтĕнче ачасен сывлăхне лагерьсенче çирĕплетес ĕçе пурнăçласси муниципаллă районсен тата хула округĕсен администрацийĕсен тивĕçĕ пулса тăрать. Пирĕн районта пурăнакансен хăйсен ачисене çуллахи вăхăтра сывлăха çирĕплетекен лагерьсене вырнаçтарас ыйтупа ăçта, хăш специалист патне пымалла-ха; Ыйту çине хурав илес тесе район администрацийĕн вĕрентÿ, çамрăксен политики тата физкультурăпа спорт пайĕн ертсе пыракан специалистне А.Н. ДАНИЛОВАНА калаçăва чĕнтĕмĕр. Мĕншĕн тесен район администрацийĕн пуçлăхĕн кăçалхи 211 " йышăнăвĕпе çÿлерех асăннă тивĕçсене пурнăçлакан ятарлă орган çирĕплетнĕ. Вăл вара шăпах вĕрентÿ пайĕ пулса тăрать.
– Район пуçлăхĕн «2010 çулта ачасемпе çамрăксен канăвне, сывлăхне çирĕплетесси тата ĕçне йĕркелесси çинчен» йышăнăвĕпе ведомствăсем хушшинчи муниципаллă комиссие те, ĕçе пурнăçлакан органа та çирĕплетнĕ. Çапла майпа çулла ачисене лагере ярас текен ашшĕ-амăшĕн заявление район администрацийĕн вĕрентÿ пайне çырса памалла. Заявленисем тăрăх эпир путевка туянас текенсен базине йĕркелетпĕр. Путевкăсене вара черет мелĕпе заявлени çырнă куна пăхса парассине тĕпе хуратпăр.
– Путевка хакĕ епле пуласси паллă-и;
– 2010 çулта хуласем тулашĕнчи ача-пăча сывлăхне çирĕплетмелли лагерьсене кайма путевкăсем туянма 2032800 тенкĕ уйăрса параççĕ. Çуллахи сменăра лагерьте канма пĕр путевкăн чи пысăк хакĕ 7700 тенкĕпе танлашать. Анчах хăраса ÿкме кирлĕ мар. Мĕншĕн тесен ашшĕ-амăшĕн путевка хакĕн 10 проценчĕ чухлĕ çеç тÿлеме тивĕ. Ытти 90 процентне ĕçе пурнăçлакан орган тÿлет. Ашшĕ-амăшĕн вара лагерьти смена пуçланнă хыççăн 5 кунран кая юлмасăр çак суммăна тÿлесе татмалла. Укçана лагерĕн кассине памалла пулать.
– Заявленисене хăçанччен çырса памалла;
– Заявленисене ашшĕ-амăшĕнчен е саккунлă представительсенчен апрелĕн 1-мĕшĕнчен тытăнса йышăнма пуçларăмăр. Çак тапхăр майăн 28-мĕшĕччен тăсăлать.
– Ытти çулсенчи пек çуллахи вăхăтра шкулсем çумĕнче лагерьсем йĕркеленĕç-и тата;
– Комиссие заявка тăратни тăрăх, ачасен сывлăхне çирĕплетмелли лагерьсем вĕрентÿ учрежденийĕсем çумĕнче кăçал та пулаççĕ. Çуллахи каникул вăхăтĕнче çакнашкал лагерьсен смени 21 кунпа танлашать, çуркуннехи, кĕркуннехи тата хĕллехи каникулсем вăхăтĕнче 7 кунран сахал пулмалла мар. Ачасене апатлантарма республика бюджетĕнчен пĕр ача пуçне 55 тенкĕ, вырăнти бюджетран 30 тенкĕ куçарса параççĕ. Ку вăл пĕр ачан пĕр кун аптланмалли сумма. Лагерьсене йĕркелесе ачасене лайăх апатлану туса пама (1-9 классенче вĕренекенсем валли) çапла майпа Муркаш районне 732300 тенкĕ уйăрса панă. Кашни шкулăн хăйĕн сумми пулать, мĕншĕн тесен укçа-тенкĕ уйăрасси лагерьте миçе ача пулнипе çыхăннă.
– Апла пулсан кашни шкултах çуллахи вăхăтра лагерьсем ĕçлесси халех паллă тесен йăнăш пулмасть пулĕ;
– Çак çĕнĕлĕх кашни шкултах çуллахи вăхăтра лагерьсем йĕркелеме май парать. Ачана шкулти лагере çÿретме ашшĕ-амăшĕн шкул администрацине заявлени çырса памалла. Заявленисене майăн 28-мĕшĕччен йышăнаççĕ. Лагерьсене санитарипе эпидемиологи пĕтĕмлетĕвĕ тивĕçлĕ пулнине шута илсе уçма ирĕк пур. Шкул çумĕнчи лагерьсенче ачасене кунне икĕ хут вĕри апатлану йĕркелесе параççĕ.
– 14 çул тултарнă тата унран аслăраххисене валли çуллахи вăхăтра ĕçпе кану лагерĕсем е ĕç бригадисем йĕркелеме палăртнă-и;
– Паллах, çак ÿсĕмрисене те айккинче тăратса хăвармастпăр. Ĕçпе кану лагерĕсемпе ĕç бригадисем пулмалла. Муниципаллă бюджетран çак ĕçе пурнăçлама 250000 тенкĕ уйăрса панă. Тата каласа хăвармалла, йывăр лару-тăруллă çемьесенче ÿсекен ачасем çине тимлĕх ытти чухнехи пекех ытларах уйăрăпăр. Ыйтусем пулсан вара 62-0-92 е 62-4-33 номерсемпе шăнкăравлама пултаратăр.
Н. НИКОЛАЕВА калаçнă.