31 марта 2010 г.
Кирек-хăш тапхăра пăхсассăн та тасалăхпа тăрăшулăхшăн, ĕçченлĕхпе сывă пурнăç йĕркишĕн, тавракурăм аталанăвĕшĕн тăрăшакансем çĕнтернĕ. Вĕсем сывлăхне упраса хăварса пĕрле ÿснĕ тантăшĕсенчен ытларах пурăнма, нумайрах ĕçлеме, хăйсем хыççăн ырă ят хăварма мехел те çитернĕ.
Асаттесемпе асаннесем пурнăç çулĕ çине тимлĕрех пăхни, çакна эпир ăнланса илни юлашки çулсенче пирĕн вăхăтра пурăнакансене те сывă пурнăç çулĕ çине туртăнма «хăвалать». Ярапай ял тăрăхĕнчи Иштерек ялĕнче пурăнакан Барановсем çапла тăваççĕ те!
Спортпа туслă çак çемье пирки тата вĕсен ÿсĕмĕсем çинчен пĕрре мар илтнĕ, анчах... Кăçалхи нарăс уйăхĕн 27-мĕшĕнче Калайкассинчи А. Г. Николаев ячĕллĕ вăтам шкулта хĕллехи полиатлон енĕпе (йĕлтĕрпе чупасси, пăшалтан тĕл пересси, турник çинче туртăнасси) иртнĕ ĕмĕрĕн 80-мĕш çулĕсенче çамрăклах Чăваш Республикин чемпионĕн ятне тивĕçнĕ хамăрăн ентешĕмĕре Юрий Иванович Федотова чысласа ирттернĕ турнирта йĕлтĕр йĕрĕ çине пĕр çын пек тухнă çак çемьепе çывăхарах паллашрăм.
Ялта пурăнакан ытти вуншар çемьерен нимĕнпе те уйрăлса тăман çемье. Кăна çиелтен пăхсан çеç çапла калама пулать. Вĕсен пурнăç çул-йĕрне пăхсан вара... Барановсем – хăйсен çемье пурнăçне спорта халалланă çынсем. Эсир сăн ÿкерчĕкре куракан Артемпа Антон йĕкĕрешсем те (7 класра вĕренеççĕ), 9-мĕш класа çÿрекен Джамилия та, Калайкасси шкулĕнче 10-мĕш çул ачасене ют çĕршыв чĕлхи вĕрентекен Лариса Вениаминовна та, пĕрремĕш çул мар предприниматель ĕçне туса пыракан Эдуард Иванович та çак кун йĕлтĕр йĕрĕ çинче чăн-чăн паттăрлăх кăтартрĕç.
– Сывă пурнăç йĕрки – пирĕнтен кашниншĕн уйрăлми пай. Çапла пулнă, пур, пулĕ те. Килте юлнă 2 çулти Даша та вăхăт çитсен пирĕнпе пĕрле ăмăртусене тухĕ, – терĕ малашлăха шанакан çемье пуçĕ Э. Баранов.
Çапла пултăрччĕ!
А. БЕЛОВ