17 марта 2010 г.
Черетлĕ суйлавччен вăхăт нумаях юлмасть. Вăл 2010 çулхи октябрь уйăхĕнче пулмалла. Асăннă суйлавра пирĕн камсене суйламалла пуласси, унăн йĕркисем пирки тĕплĕнрех район администрацийĕн йĕркелÿпе кадрсен, право енĕпе тивĕçтерессин тата вырăнти самоуправлени органĕсемпе ĕçлекен пайĕн пуçлăхне Лилия Юрьевна ТАРАСОВАНА каласа пама ыйтрăмăр.
– Вырăнти самоуправлени органĕсен представителĕсене иртнĕ созывра 2005 çулхи октябрь уйăхĕнче суйланăччĕ. 2010 çулхи октябрь уйăхĕнче вĕсен полномочи тапхăрĕ тухать. Апла пулсан Муркаш район пуçлăхне, 16 ял тăрăхĕн пуçлăхне, депутатсен районти Пухăвĕн 25 депутатне тата депутатсен ял тăрăхĕсенчи Пухăвĕсен 185 депутатне çĕнĕрен суйламалла пулать.
Район пуçлăхне суйлассипе хăш-пĕр улшăнусем пур. Муркаш район пуçлăхне депутатсен Муркаш район Пухăвĕ хăйĕн йышĕнчен суйлать. Район пуçлăхĕ хăйĕн полномочийĕсене яланлăх мар професси тытăмĕпе пурнăçлать. Тепĕр майлă каласан, обществăлла йĕркепе.
Муркаш район пуçлăхĕ хăйĕн полномочийĕсемпе килĕшÿллĕн çак тивĕçсене пурнăçлать:
– ытти муниципаллă пĕрлешÿсен вырăнти самоуправлени органĕсем, патшалăх влаç органĕсем, граждансемпе организацисем тĕлĕшпе районшăн ответлă пулса тăрать, Муркаш районĕшĕн доверенноçсăрах ĕçсем пурнăçлать;
– депутатсен районти Пухăвĕ йышăннă Уставпа палăртнă нормативпа право акчĕсене алă пусать тата халăха пĕлтерет;
– хăйĕн полномочийĕсемпе килĕшÿллĕн йышăнусемпе хушусем кăларать;
– депутатсен районти Пухăвĕн черетсĕр ларăвне пухма ыйтма пултарать;
– районти вырăнти самоуправлени органĕсем вырăнти пĕлтерĕшлĕ ыйтусене тата федераллă саккунсемпе, Раççей Федерацийĕн субъекчĕсен саккунĕсемпе вырăнти самоуправлени органĕсем çине хунă полномочисене татса панине тĕрĕслесе тăрать.
Район пуçлăхĕ район çыннисем тата депутатсен районти Пухăвĕ умĕнче ответлă пулса тăрать. Вăлах депутатсен районти Пухăвĕн ĕçне-хĕлне йĕркелесе ертсе пырать. Палăртрăмăр ĕнтĕ, ăна депутатсен йышĕнчен суйлаççĕ.
Район Уставĕн 29-мĕш статйинче Муркаш районĕн пуçлăхне суйлассин йĕрки пирки каланă. Унта палăртнă тăрăх, район пуçлăхне депутатсен районти Пухăвĕ хăйĕн йышĕнчен депутатсен районти Пухăвĕн полномочийĕ вĕçленичченхи тапхăра валли суйлать. Район пуçлăхĕн кандидатури пирки сĕнÿсене депутатсем депутатсен районти Пухăвĕн черетлĕ (черетсĕр) ларăвĕнче тăратаççĕ. Район пуçлăхне депутатсем хăйсен ирĕкĕпе уççăн е вăрттăн сасăласа суйлаççĕ. Ăна депутатсен районти Пухăвĕн регламентĕнче палăртса хураççĕ. Депутатсен районти Пухăвĕн депутачĕсенчен ытларахăшĕ сасăланă кандидат район пуçлăхне суйланнă шутланать.
Район пуçлăхне суйланине депутатсен районти Пухăвĕ хăйĕн йышăнăвĕпе çирĕплетет. Ун пирки пĕлтернине район пуçлăхне суйланă кунран тытăнса 7 кунран кая юлмасăр вырăнти массăллă информаци хатĕрĕсенче пичетлесе кăларма тивĕç.
Район Уставĕпе килĕшÿ-ллĕн Муркаш район администрацийĕн пуçлăхĕ пулма конкурс итогĕсемпе депутатсен районти Пухăвĕн полномочийĕ тухичченхи тапхăра çирĕплетнĕ çын тивĕçет. Район администрацийĕн пуçлăхĕ пулмалли çыннăн кандидатурине конкурс итогĕсемпе конкурс комиссийĕ тăратнă кандидатсенчен суйласа илеççĕ.
Район пуçлăхĕ район администрацийĕн пуçлăхĕпе контракт тăвать. Район администрацийĕн пуçлăхĕ валли контракт условийĕсене депутатсен районти Пухăвĕ çирĕплетет.
Район пуçлăхĕпе район администрацийĕн пуçлăхĕ тĕлĕшпе калакан положенисем хальхи депутатсен районти Пухăвĕн полномочи срокĕ тухнăранпа вăя кĕреççĕ. Апла пулсан ку вăл 2010 çулхи октябрь уйăхĕнче пулать.
В. ШАПОШНИКОВ çырса илнĕ.