03 марта 2010 г.
Чăваш телевиденийĕн парнисене çĕнсе илессипе февралĕн 24-27-мĕшĕсенче республикăра пысăк ăмăрту иртнĕ. Ишекенсем çак палăрăмлă ăмăртăва республикăн пур кĕтесĕсенчен кăна мар, республика тулашĕнчен те пуçтарăннă: вăтăра яхăн команда хутшăннă.
Пирĕн районтан унта В.Д. Герасимов тренер-преподавателĕн икĕ воспитанникĕ – Ирина Григорьева тата Екатерина Авдеева хутшăннă. Ирина уйрăмах ăнăçлă ăмăртнă: 50 метра кроль мелĕпе ишессинче вăл ăмăртăва хутшăннă хĕрсенчен 5-мĕш вырăна тухма пултарнă. Хусан, Нижнекамск, Ульяновск хулисенчен килнĕ ишекенсем хыççăн – Муркаш хĕрĕ. Çапла хăйĕн ÿсĕмĕнчисем хушшинче пирĕн Ирина республикăра чи малта: 32,9 çеккунт кăтартуран иртекенни пулман. Катя вара аслисен 3-мĕш разрядне пурнăçлама хал çитернĕ.
Шел пулин те, командăпа хутшăнма май килменнине пĕлтерет Виталий Данилович. Ачасем хальлĕхе ишесси те, спортăн ытти тĕсĕсем пекех, кулленхи тренировкăсене сиктермесĕр çÿренипе çыхăннине ăнкарсах илеймеççĕ пулас-ха. Тата, пытарма та кирлĕ мар, нумай конкурс-ăмăртусене чылай чух пĕрисемех хутшăнаççĕ. Апла ашшĕ-амăшĕн те çак ĕçре ачисене кăштах пулăшни ытлашши пулмĕ: пур енĕпе те пĕр пек аталанаймасть вĕт ача та.
Анчах та Муркашра ФСК уçнăранпа ачасене бассейнра ишме май пурри чăнах та аван. Çÿлерех асăннă кăтартусем пуррине шута илсен, пушшех те савăнмалла Муркашсен. Кĕске вăхăтрах республикăри ăмăртусенче тивĕçлĕ шая çитме тытăннă-çке-ха ишекенсем. Апла пултаруллă тренерăн ĕçĕ те куç умĕнчех.
Пирĕн ФСК ятне тата Муркаш ятне малашне ишекенсем те кирлĕ шайра тытса тăма пуçлассине ĕненес килет. Пĕрле тăрăшса ĕçлесен ÿсĕмсем ытларах та пулĕç.
Сăн ÿкерчĕкре: «Ĕнер ăмăртуран таврăнтăмăр, паян – тренировкăна».
Н. НИКОЛАЕВА.
Муркашсем – Раççей командинче
Вера Соколова, Нина Охотникова, Петр Трофимов – паллă спортсменсем, Муркашри В. Егорова ячĕллĕ спорт шкулĕн воспитанникĕсем – иртнĕ кунсенче Сочи хулинче Раççейри хăвăрт утакансен ăмăртăвĕнче Чăваш Республикин чысне хÿтĕленĕ.
Хĕрарăмсем хушшинче Вера Соколова иккĕмĕш вырăн çĕнсе илнĕ. Юниорсен ретĕнче вăй виçнĕ Нина та кĕмĕл медале тивĕçнĕ. Петр Трофимов вара пăхăр медаль призерĕ пулса тăнă. Вĕсене виççĕшне те кăçалхи май уйăхĕнче Мексикăра иртекен Тĕнче чемпионатне хутшăнма Раççей çĕршывĕн пĕрлештернĕ командине кĕртнĕ.
Çак пысăк пĕлтерĕшлĕ ăмăрту хыççăнах, февралĕн 23-24-мĕшĕсенче, Чăваш патшалăх педагогика университечĕн студенчĕ Петр Трофимов Волгоградра иртнĕ Раççейри студентсен ăмăртăвне хутшăннă. Унта 5 километрлă дистанцире хастар спортсмена çитекенни пулман. Университет команди вара пĕтĕмĕшле зачетсен кăтартăвĕсемпе иккĕмĕш вырăн çĕнсе илнĕ.
Велотрасса çинче
Чăваш Республикинче велосипед спорчĕ вăй илсех пырать. Акă февраль уйăхĕн вĕçĕнче спортăн çак тĕсĕпе республикăн хĕллехи ăмăртăвĕ иртнĕ. Старта пурĕ 119-ăн хутшăннă. Муркашри В. Егорова ячĕллĕ спорт шкулĕн тренер-преподавателĕ И. Воробьев ертсе пынипе пирĕн спортсменсем те унта активлă хутшăннă.
Юниорсем хушшинче ăмăртнă Людмила Филиппова (1992-1993 çулсенче çуралнисен ушкăнĕнче) çĕнтерÿçĕ пулса тăнă. Аслă ÿсĕмри хĕрсем хушшинче (1994-1995 çулсенче çуралнисем) Ирина Портнова кĕмĕл медаль çĕнсе илме пултарнă. Надежда Антонова Анастасия Тимофеевана 9 çеккунт выляса ярса финиша 4-мĕш çитнĕ. 1996-1997 çулсенче çуралнисен ÿсĕмĕнче Светлана Данилова иккĕмĕш пулнă. 1998 çулта çуралнисем тата кĕçĕнреххисем хушшинче Вероника Замкована çитекенни пулман.
Çамрăк спортсменсене малашне те ăнăçусем сунатпăр.
Хамăр инф.
А.А. Быкова халалласа
Спортпа туслă пулни сывлăхшăн усăллă пулнине Çатракасси ял тăрăхĕнче, кунти шкулта яланах асра тытаççĕ. Çавна май вăтам шкул йĕркеленипе ăмăртусем тăтăшах иртеççĕ. Акă мартăн 7-мĕшĕнче те черетлĕ ăмăрту ирттерме палăртатпăр. Ку вăл – ялсенчи шкулсем хушшинчи район спартакиади. Унта организацисемпе предприятисен командисем те хутшăнаççĕ. Ку ăмăртăва пирĕн ентеше, Мухтав орденĕн тулли кавалерне Александр Артемьевич Быкова халалласа йĕркелетпĕр.
Спортсменсем йĕлтĕрпе чупассипе, шашкăлла тата шахматла выляссипе, сĕтел çи теннисла, волейболла выляссипе вăй виçĕç.
Л. НИКИТИНА,
Çатракассинчи вăтам шкул директорĕн воспитани парас енĕпе ĕçлекен çумĕ.