03 марта 2010 г.
Шăмат кун ЧР Президенчĕ Николай Федоров Хĕрлĕ Чутай тăрăхĕнче пулчĕ. Малтанах Тралькассинче пĕтĕмĕшле çемье врачĕн офисне уçма хутшăнчĕ. Хăтлă çуртра чирлисене йышăнмалли пÿлĕмсем, кăнтăрла сипленмелли стационар палати вырнаçнă. Офис Тралькассипе Мăн Этмен ял тăрăхĕсенчи икĕ пин çурă çынна медицина пулăшăвĕпе тивĕçтерĕ. Кунта ку чухнехи сплев оборудованийĕпе ятарласа вĕреннĕ тухтăр тата виçĕ медицина сестри ĕçлĕç. Чăваш Енре çакăн йышши офиссем – 600.
Паянхи кун ыйтăвне тивĕçтерекен сиплев учрежденийĕ ку тăрăхра уçăласса ял çыннисем ĕненме те пултарайман. Офиспа паллашнă май Николай Васильевич виçĕ ача амăшĕпе Надежда Мурайкинапа калаçрĕ. Надежда Геннадьевна яла тимлĕх уйăрнăшăн Президента ăшшăн тав турĕ. «Ку таранччен пĕчĕк ачасемпе район больницине автобуспа çÿреттĕмĕр. Тивĕçлĕ медицина пулăшăвне малашне ялтах илĕпĕр. Халĕ тăваттăмĕш ача пирки те шухăшлама пулать», - терĕ хĕрарăм савăнăçне пытараймасăр. Президент ку шухăша ырласа: «Паянхи пулăм – Чăваш Енре пурăнакансен сывлăх сыхлавĕшĕн малта пыракан медицина технологийĕсемпе туллин усă курма май паракан пĕлтерĕшлĕ тепĕр утăм. Ку вăл паянхи тата малашлăхри кунсенче харпăрлăх туйăмĕ ÿснин палли те», - терĕ. Николай Васильевич пĕтĕмĕшле врач офисĕнче ĕçлекенсене медицина оборудованийĕ туянма 100 пин тенкĕлĕх сертификат пачĕ.
Унтан Н.В. Федоров «Коминтерн» ял хуçалăх пĕрлешĕвĕн сысна фермине çитсе курчĕ. Республика ертÿçи çакна палăртрĕ: юлашки 4 çулта хуçалăхра производство калăпăшĕ 400 процент, ĕç тухăçлăхĕ 700 процент ÿснĕ. «Пысăк çитĕнÿсем конкуренцире кĕрешме май парĕç. Патшалăх тăрăшса ĕçлекенсене малашне те пулăшĕ», - терĕ Николай Федоров. Президент республикăра сĕт тирпейлекен 700 миллион тенкĕлĕх çĕнĕ завод тума палăртнине хыпарларĕ. Çакă предприятисенчен туянакан сĕт хакне хăпартма май парĕ.
«Хуçалăх кăткăс тапхăрта та сулмаклă аталанать. Ĕçе пĕлсе йĕркелесен, таса чунпа ĕçлесен – кашни проектах хăйĕн хакне кăларать», - пĕтĕмĕлетрĕ Николай Васильевич.
Республика ертÿçи Атнарти çĕнетнĕ культура çуртне те çитсе курчĕ, кунта ĕçлекенсем валли видеопроекци оборудованийĕ, музыка хайлавĕсене илемлетме май паракан компьютер хатĕрĕсем, принтер, сканер, артистсем валли чаплă костюмсем уйăрни çинчен пĕлтерчĕ, çакна çирĕплетсе свидетельство пачĕ.
Юлашкинчен Н.В. Федоров район активĕпе канашлу ирттерчĕ.
(Хамăр инф.).