13:15 06 мая 2017 г.
Районта çурхи ака-суха ĕçĕсем анлă сарăлнă вăхăт. Кĕске вăхăтрах çĕр ĕçченĕ кĕрхи культурăсене апатлантарас тата нумай çул ÿсекен курăксен пуссисенче нÿрĕк тытса хăварас ĕçсене пĕтĕмĕшле вĕçлерĕ. Паян пĕтĕм ĕç вăйĕ çуртрисем вăхăтра акса хăварас ĕçре. Ĕнерхи куна районĕпе çак ĕçе 700 гектара яхăн пурнăçланă.
Çу уйăхĕн 6-мĕшĕнче района çурхи уй-хир ĕçĕсем епле пынипе паллашма Чăваш Республикин Пуçлăхĕ Михаил Игнатьев, ЧР Министрсен Кабинечĕн Председателĕн заместителĕ - ял хуçалăх министрĕ Сергей Артамонов килсе çитрĕç Вĕсем район администрацийĕн пуçлăхĕпе Ростислав Тимофеевпа вырăнсенчи ĕçсемпе паллашас тĕллевпе «Свобода» ял хуçалăх производство кооперативĕнчи акаçăсем патне çитрĕç.
«Свобода» хуçалăхра выльăх-чĕрлĕх ĕçчетессипе пĕрлех тĕш тырăпа пăрçа йышши культурăсене ытлă-çитлĕ акса ÿсетерсси те пĕлтерĕшлĕ вырăнта. Çÿллĕ шайри хăнасем хире çитнĕ чух Кашмаш ял пуçĕнче икшер сеялкăллă 3 агрегат урпа акатчĕ. Уй хĕрринче вăрлăхпа тата минераллă удобренипе тухнă автомашина ака агрегачĕсем çаврăнса çитессе кĕтетчĕ. Хуçалăхăн тĕп агрономĕ А. Блинов та кунтах пулни хуçалăх акара тĕллевлĕ вăй хунине çирĕплетрĕ.
- Механизаторсем те, акаçăсемпе водительсем те, çурхи-уй-хир ĕçне хутшăнакан ытти çынсем те хăйсене шаннă ĕçе тÿрĕ кăмăлпа пăрнăçлаççĕ.Çур аки çулталăк тăрантарать. Çакна пирĕн хуçалăх ĕçченĕсем кашниех ăнланса ĕçлеççĕ. Хуçалăхра паян пурте уй-хир ĕçĕсен планĕпе килĕшÿллĕн вăй хураççĕ. Хальхи тăрăшулăх кĕр пуянлăхне çаврăнасса шанатпăр, - терĕ хуçалăх агрономĕ А. Блинов Республика Пуçлăхĕ ĕç вăйĕ çитнипе кăсăклансан.
Çÿлте тăракан хĕвел çурхи кашни сехетпе туллин усă курма ыйтать. Кашмашсем çакна ăнланса вăй хураççĕ. Хуçалăх кĕске вăхăтра иртнĕ çул 450 гектар акса хăварнă кĕрхи культурăсене апатлантарса тухнă.Умра - 750 гектар çуртрисем. Ку ĕçе кĕске вăхăтра ирттерме çĕрне чылай хатĕрленĕ, вăрлăхпа минераллă удобренисем çитсе пыраççĕ. Çуртрисен вăрлăхне пĕтĕмпех имçамласа акаççĕ.
Акаçăсемпе калаçнă чух Михаил Васильевич ĕç тумтирĕпе тивĕçтернипе, ĕçлекенсене епле апатлантарнипе кăсăкланчĕ. Акара ĕçлекенсене кунне икĕ хутчен вĕри апатпа тивĕçтернине илтсен ĕçлеме условисем пуррине палăртрĕ.
- Паян яра куна туллин ĕçлесе ирттермелле. Хальлĕхе çĕрте нÿрĕк пур. Унпа усă курса юлмалла, - терĕ Республика Пуçлăхĕ «Свобода» хуçалăхăн майĕсемпе паллашнă хыççăн кооператив ертÿçине Л. Петрова усă курман çĕрсене пусă çаврăнăшне кĕртессипе ытларах ĕçлемеллине палăртса.
«Свобода» хуçалăхри акаçăсем патĕнче пулнă хыççăн Михаил Игнатьев ЧР Министрсен Кабинечĕпе, ытти районсен администраци пуçлăхĕсемпе видеоканашлу ирттерчĕ.
АУ «Редакция Моргаушской районной газеты «Знамя победы» Мининформполитики Чувашии