Муркаш районĕнче çулсеренех иртсе пыракан «Чечеклен, юратнă Муркаш Ен!» фестиваль-конкурс малалла пырать. Кăçал ăна Экологи тата Атте–Аннен ҫулталăкне халалланă. Пуш уйăхĕн 2-мĕшĕнче эстафетăна Оринин ял тăрăхне кĕрекен художество пултарулăх ушкăнĕсем йышăнчĕç.
Орининти культура çуртне пухǎннисем ку хутĕнче халăх» ятне тивĕçнĕ «Орин ен» - ветерансен халăх хорĕ (ертўçи – Чăваш Республикин культурăн тава тивĕçлĕ ĕçченĕ Владимир Александров), Мулкачкасси клубĕ çумĕнче йĕркелленнĕ «Пучах» (ертўçи-Надежда Кондукторова, Чăваш Республикин культурăн тава тивĕçлĕ ĕçченĕ) тата Атапай клубĕ çумĕнчи «Сурпан» (ертўçи – Чăваш Республикин культурăн тава тивĕçлĕ ĕçченĕ – Родион Петров) ушкăнсен пултарулăхĕпе паллашма пултарчĕç. Муркашран ятарлă комисси те палăртнă вăхăта килсе çитрĕ.
Пултаруллăх коллективĕсем курма килнĕ çынсене концертăн çĕнĕ программипе паллаштарчĕç. Концерт программи тĕрлĕ юрǎ-кĕвĕпе, ташǎсемпе, шÿтсемпе пуян пулчĕ. Куракансем вара кашни коллективах ăшшăн кĕтсе илчĕç, тăвăллăн алă çупса артистсене хавхалантарчĕç.
Жюри председателĕ Елена Геннадьевна Чернова курава пĕтĕмлетнĕ май, Оринин ял тăрăхĕнчи артистсене тав сǎмахĕ каларĕ, малашне те куракансене хăйсен пултарулăхĕпе савăнтарма вǎй-хǎват, ырлăх-сывлăх, телей сунчĕ.
Орининское сельское поселение Моргаушского района