09:00 27 января 2015 г.
Январĕн 21-мĕшĕнче Чăваш Ен Пуçлăхĕ Михаил Игнатьев Чăваш Республикин Патшалăх Канашне яракан хăйĕн çулленхи Çырăвĕпе тухрĕ. Çырăва вуласа панипе Чăваш Ен влаç органĕсен пĕрлехи порталĕнчи тÿрĕ трансляцире паллашнă май районти патшалăх тата муниципалитет услугисемпе тивĕçтерекен нумай функциллĕ центр ĕçченĕсем хыççăнах асăннă документăн тĕп положенийĕсене сÿтсе яврĕç.
Чăваш Ен Пуçлăхĕ Михаил Игнатьев хăйĕн Çырăвĕнче нумай функциллĕ центрсем çынсене услугăсемпе тивĕçтерессипе чăннипех те пысăк ĕç туса ирттернине палăртать. Юлашки çулсенче кун пек центрсене республикăра 27 йĕркеленĕ. Вĕсен тивĕçĕ - граждансене патшалăх тата муниципалитет услугисем, справкăсемпе ытти документсем илессишĕн тĕрлĕ инстанцисем тăрăх çÿресе вăхăта çухатассинчен хăтарасси, ку тĕлĕшпе меллĕ майсем туса парасси.
Михаил Васильевич палăртнă тăрăх, иртнĕ çул кăна 150 тĕрлĕ услуга илме нумай функциллĕ центрсене 290 пин çын ытла пынă. Ял çыннисем те 232 тĕслĕх библиотекăра йĕркеленĕ центр филиалĕсенче «пĕр чÿрече» мелĕпе 7 пин консультаци, 1400 услуга илме пултарнă. Хальхи вăхăтра республикăра пурăнакансен 68 проценчĕ «пĕр чÿрече» мелĕпе патшалăх тата муниципалитет услугисемпе усă курма пултарать. Республика Пуçлăхĕ палăртнă тăрăх вара çулталăк вĕçленнĕ тĕле МФЦ услугисемпе усă курма пултаракансен шутне 90 процента çитермелле.
Пирĕн районта та «пĕр чÿрече» мелĕпе çынсене патшалăх тата муниципалитет услугисемпе тивĕçтерессин механизмне малалла аталантарса пыма палăртаççĕ. Чи малтан татса памалли задачăсенчен пĕри - документсем йышăнмалли тата памалли «чÿречесен» шутне ÿстересси, çынсен ыйтăвне тивĕçтерме каякан вăхăта май пур таран чакарасси тесе шутлаççĕ нумай функциллĕ центр ĕçченĕсем.
В. ЛЕОНИДОВ.
АУ «Редакция Моргаушской районной газеты «Знамя победы» Мининформполитики Чувашии