16:10 03 марта 2014 г.
Районăн спорт пурнăçĕ тĕрлĕ ăмăртусемпе пуян. Вĕсем хушшинче вара районти «Çĕнтерÿ ялавĕ» хаçат редакцийĕ хăйĕн кубокĕсене çĕнсе илессишĕн шашкăлла выляссипе çуллен ирттерекен ăмăрту та тивĕçлĕ вырăн йышăнать.
Малтанах çавна палăртса хăвармалла. Шашкăлла вылясси районта япăх мар сарăлнă спорт тĕсĕсенчен пĕри. Çакă та ăна аван çирĕплетет. Республикăри ытти ял районĕсенче спортăн çак енĕпе спорт маçтăрĕн кандидачĕн нормативне пурнăçлама пултарнисем 3 - 4 çын таран пулсан, пирĕн районта вĕсем 9-ăн. Хăйсен ăсталăхне тĕрлĕ шайри ăмăртусенче туптаççĕ, çитĕнÿсем тăваççĕ.
Нумаях пулмасть шашистсен ăмăртăвĕ Йÿçкассинче Александр Ермолаев йĕркеленипе унăн парнисене çĕнсе илессишĕн иртнĕччĕ. Мартăн 1-мĕшĕнче вара шашка ăстисем район хаçачĕн редакцине хăйсен çулленхи ăмăртăвне пухăнчĕç.
Ăмăрту çивĕч пуласси малтанах паллă пулчĕ. Райхаçат кубокĕсене çĕнсе илессишĕн шашкăлла выляссипе ирттерекен ăмăртăва хутшăнма кăмăл тунисен йышĕ ÿссе пыни савăнтарать. Кăçалхи ăмăртăва 17 участник - 12 арçынпа 5 хĕрарăм килсе çитрĕ. Вĕсем хушшинче çамрăксем, ăмăртăва пуçласа хутшăнакансем те çук мар. Кусем вĕсем Оринин ял тăрăхĕнчи Вăрманкасси ялĕнчен Александр Репин, Алина Репина, Çатракассинчен Владислав Семенов, Отарккăран Андрей Николаев, Анаткас Апашран Андрей Охотников т. ыт. те. Шашка вăййин «аксакалĕсем» шутĕнче вара 17 хутчен район чемпионĕ пулса тăнă Леонид Андреев, 6 хутчен çак чыса тивĕçнĕ тата районăн хальхи чемпионĕ Александр Ермолаев, 2 хутчен чемпион пулнă Алексей Прокопьев. Актайри 74 çулхи Михаил Федоров та ăмăртăва çулленех хутшăнать.
Арçынсем хушшинче пĕрремĕш вăйăран тытăнсах Алексей Прокопьев ăнăçлă вылярĕ. Вăл хăйĕнпе вылянă 11 участникран 10-шĕнчен выляса илме пултарчĕ. Леонид Андреевпа кăна тытăçу никам та çĕнтерейменнипе вĕçленчĕ. Çапла вара Алексей Георгиевич 11 очко пухма май пур çĕртен 10,5 очко пухса пĕрремĕш вырăн йышăнчĕ, район хаçачĕн кубокне çĕнсе илчĕ. Иккĕмĕшпе виççĕмĕш вырăнсенче Мăн Сĕнтĕрти Виталий Егоров тата Леонид Андреев. Вĕсем 9,5 тата 9 очко пухрĕç.
Хĕрарăмсенчен Муркашра пурăнакан Анфиса Анисимовăна çитекенни пулмарĕ. Пĕрремĕш вырăн йышăннипе пĕрлех кубока та вăл тивĕçрĕ. 2-мĕшĕ Муркашри Алевтина Авдеева тата 3-мĕшĕ Вăрманкассинчи Наталия Дмитриева.
Призлă вырăн йышăннисене район хаçачĕн тĕп редакторĕ Анатолий Тихонов, ăмăртăвăн тĕп судйи Виталий Егоров саламларĕç, дипломсемпе медальсем парса чыс турĕç, спорт ăмăртăвĕсенче те, кулленхи пурнăçра та малашне ăнăçусем, ырлăх-сывлăх сунчĕç. Анатолий Иванович шашкăлла выляссипе район хаçачĕн кубокĕсене çĕнсе илессишĕн ирттерекен ăмăртăва хутшăнма кăмăл тунăшăн пурне те тав сăмахĕ каларĕ, çитес ăмăртура та вĕсене курасса шанни пирки пĕлтерчĕ.
В. ШАПОШНИКОВ
АУ «Редакция Моргаушской районной газеты «Знамя победы» Мининформполитики Чувашии