10:25 24 апреля 2013 г.
«Нечерноземагропромстройăн» хисеплĕ строителĕ Н. Гусак ячĕпе тата «Моргаушская» МСО» акционерсен хупă пĕрлешĕвĕн куçса çÿрекен кубокне çĕнсе илессишĕн шăмат кун, апрелĕн 20-мĕшĕнче, Юнкăпуçĕнче волейбол вăййисен ăмăртăвĕ иртрĕ.
Краснодар тăрăхĕнче çуралса ÿснĕ Николай Александрович Гусак Муркаш районĕнче питĕ сумлă çын пулса тăнă. Николай Александрович ертÿçĕ пулнă çулсенче районти строительство организацийĕ республикăра лайăххисен шутĕнчен тухман. 1980-мĕш çулсенче вара районта строительство ĕçĕсем питĕ пысăк калăпăшпа пынă: шкулсем, ача сачĕсем, спортзалсем, амбулаторисем, фермăсем çĕкленсе хута кайнă. Юнкăпуçĕнче те уçă вырнăта спортзал çĕкленнĕ... Николай Александровичăн кунта пурнăçланă строительство ĕçĕсене республика шайĕнче хакласа ăна хисеплĕ ят панă та.
Н. Гусак ячĕпе волейбол вăййине ирттересси малтан 1980-мĕш çулсенче пуçланса кайнă. Тĕрĕсрех каласан 1983-мĕш çулта «Строитель» кубок çирĕплетнĕ. Çулсеренех иртекен ăмăртусенче МСО строителĕсем чылай çĕнтерÿ тума пултарнă. Хăш-пĕр çулсенче, шел пулин те, ăмăрту иртмен. Иртнĕ ĕмĕрте пуçланнă ырă ĕçе МСО-н хальхи генеральнăй директорĕ В. Семенов çĕнĕрен чĕртсе тăратрĕ темелле. Кăçалхи ăмăртăва пуçтарăннă хăнасем, вăл шутра Н. Гусакпа пĕрле ĕçленисем те, Владислав Николаевичăн пуçарулăхĕпе хастарлăхне пĕрре мар палăртса каларĕç. Район пуçлăхĕ И. Николаев, район администрацийĕн пуçлăхĕ Р. Тимофеев, «Чувашиякурорт» санатори» акционерсен уçă пĕрлешĕвĕн генеральнăй директорăн çумĕ В. Вязов тата ыттисем те хисеплĕ строителĕн ырă ĕçĕсем пирки каласа МСО-н пуласлăхĕ шанчăклă алăра пулнине палăртрĕç, спортсменсене ăнăçу сунса куркансене илемлĕ вăйăсем парнелеме сĕнчĕç.
Вăйăсем пуçланиччен В. Вязов «Чи çамрăк та шанăç кÿрекен вылякан» номинаци палăртса ăна валли ятарлă парне хатĕрленине пĕлтерчĕ. Районти шалти ĕçсен пайĕн пуçлăхĕ Е. Плечов та хăйĕнчен икĕ номинаци валли укçан парне (1 пиншер тенкĕ) хатĕрленĕ: «Чи лайăх капитан» тата «Чи усăллă вылякан» валли.
Кăçалхи ăмăртăва 9 команда хутшăнма кăмăл турĕ: «Райбыт», «Моргаушская» МСО», Мăн Сĕнтĕрсен, Юнкă ял тăрăхĕн тата шалти ĕçсен пайĕн командисем (çак пилĕк команда шăпа янă тăрăх вырăнти спортзалта выляма юлчĕç), «Передовик», «Транзит-Сити», «ВикторияÇ» тата Ярапайкасси ял тăрăхĕн команди (кусем Орининти вăтам шкул спортзалĕнче вылярĕç). Команда чылай пулнăран куракансем каçченех илемлĕ вăйăпа киленме пултарчĕç.
«Райбыт» команда, малтанхи икĕ çулĕнче те çĕнтерÿçĕ пулнăскер, мăнаçлă та илемлĕ куçса çÿрекен кубока кăçал та алăран вĕçертес мар шухăшлине хăйĕн ăста та илемлĕ вăййипе кăтартса пачĕ. Тăрăшни чăнах та çĕнтерÿ патнех илсе пычĕ. 2-мĕш вырăна «Транзит-Сити» тухрĕ, 3-мĕшне – «Моргаушская» МСО».
Уйрăм вылякансене тĕрлĕ номинацисенче палăртрĕç. Йăлана кĕнĕ тăрăх волейболистсенчен «Чи лайăх тапăнакана», «Чи лайăх выляттаракана» тата «Чи лайăх хÿтĕлекене» палăртрĕç. Асăннă йĕркепе вĕсем: «Райбытри» Алексей Владимиров, «Моргаушская» МСО-ри» Алексей Толстов, «Транзит-Ситири» Сергей Алексеев пулчĕç. Маларах асăннă ятарлă парнесене «Транзит-Ситири» Анатолий Налимов («Чи çамрăк та шанăç кÿрекен вылякан»), шалти ĕçсен пайĕн командинчи Михаил Блинов («Чи лайăх капитан») тата «Транзит-Ситири» Дмитрий Пушков («Чи усăллă вылякан») тивĕçрĕç.
Н. Николаева.
АУ «Редакция Моргаушской районной газеты «Знамя победы» Мининформполитики Чувашии