00:00 25 января 2012 г.
Хаçатăн 2011 çулхи декабрĕн 31-мĕшĕнчи номерĕнче район администрацийĕн пуçлăхне суйлассипе конкурс комиссийĕ конкурс ирттересси пирки пĕлтернине тата унăн условийĕсене пичетленĕччĕ. Район пуçлăхне суйлас ĕçсем çак вăхăта мĕнле пыни пирки конкурс комиссийĕн секретарĕ Л.Ю. ТАРАСОВА каласа пама кăмăл турĕ:
– Условисемпе килĕшÿллĕн район администрацийĕн пуçлăхне суйланас текенсен конкурс комиссине 2012 çулхи январĕн 21-мĕшĕнчен кая юлмасăр, 17 сехетчен, заявленипе ытти кирлĕ документсене çитерсе памаллаччĕ.
Çак йывăр çĕклеме хăйсем çине илес текенсем пурри шанăç çуратать. Çапла вара 2012 çулхи январĕн 27-мĕшĕнче район администрацийĕн 308-мĕш пÿлĕмĕнче 10 сехетре район администрацийĕн пуçлăхне суйлассипе конкурс комиссийĕн ларăвĕ иртет.
Район администрацийĕн пуçлăхĕ пулма хăйсен кандидатурисене çаксем сĕннĕ тата вĕсене регистрациленĕ:
1. Никитин Владимир Германович, Муркаш район администрацийĕ, район администрацийĕн пуçлăхĕн çумĕ – капиталлă строительство, архитектура тата пурăнмалли çурт-йĕрпе комммуналлă хуçалăх управленийĕн пуçлăхĕ.
2. Касьянов Анатолий Калистратович, Чăваш Республикин Çут çанталăк ресурсĕсен тата экологи министерствин «Опытное лесничество» КУ, Ильинка участокĕн лесничествин лесничийĕ.
3. Мефодьев Владимир Венедиктович, «Фэнстер» ООО, директор.
4. Тимофеев Ростислав Николаевич, «Герой» ял хуçалăх производство кооперативĕ, председатель.
5. Ямангеев Владимир Владиславович, хресчен (фермер) хуçалăхĕ, ертÿçĕ.
6. Туритов Иссаул Васильевич, уйрăм предприниматель.
7. Макаров Евгений Дмитриевич, Суд приставĕсен Федераллă службин Чăваш Республикинчи управленийĕн ертÿçин çумĕ.
Кандидатсене пурне те ăнăçу сунатпăр. Çапах та комисси чи тивĕçлине Муркаш район администрацине ертсе пыма шанĕ.
Комисси сĕннĕ кандидатурăна хыççăн депутатсен районти Пухăвĕн ларăвĕнче çирĕплетĕç.
В. ШАПОШНИКОВ калаçнă.